MIAKA 60 YA UHURU: SINGIDA YAJIVUNIA USALAMA WA CHAKULA

      Hali ya Uzalishaji wa mazao makuu ya chakula katika mkoa wa Singida umeongezeka kutoka tani 197,886 mwaka 1990 hadi kufikia tani 821,882 mwaka 2020/2021.

     Hayo yameelezwa leo na Mkuu wa mkoa wa Singida Dkt. Binilith Mahenge wakati akiwahutubia wananchi katika kilele cha maadhimisho ya kimkoa ya miaka 60 ya uhuru yalifanyika katika uwanja wa Jumbe wilayani Manyoni mkoani Singida.

   Dr. Mahenge alisema kipindi cha miaka 60 ya uhuru Mkoa wa Singida umeweza kujitosheleza kwa chakula sambamba na ongezeko la uzalishaji wa mazao ya biashara yakiwemo  Alizeti, ufuta, dengu, korosho na vitunguu kutokana na mabadiliko katika matumizi ya teknolojia ya zana za kilimo na hasa ubora wa pembejeo za kilimo.

    “uzalishaji wa mazao ya chakula ya kipaumbele kama mtama, uwele, viazi vitamu na muhogo, uliongezeka kutoka Tani 194,878 mwaka 2005/2006 hadi kufikia Tani 395,594 mwaka 2020/2021” Amesema Dkt. Mahenge.

      Aidha amebainisha kwamba uzalishaji wa mazao ya biashara ya kipaumbele ambayo ni alizeti, pamba, vitunguu, na korosho uliongezeka kutoka Tani 41,746 mwaka 2005/2006 hadi Tani 230,793 mwaka 2020/2021.  Zao la alizeti pekee uzalishaji umeongezeka kutoka Tani 28,917 mwaka 2005/2006 hadi Tani 222,8000 mwaka 2020/2021, aliendelea kufafanua RC Mahenge.

   Akizungumzia ongezeko la viwanda katika kipindi cha miaka 60 ya uhuru RC Mahenge amebainisha kwamba Mwaka 1961 hapakuwa na viwanda vya usindikaji wa alizeti lakini hadi kufikia  mwaka 2021 kuna jumla ya viwanda 204 vinavyofanya kazi.

    “Mwaka 1961 viwanda vidogo vilikuwa ni vichache na vilikuwa vya fani ya useremala, uhunzi na utengenezaji chumvi, na sasa vipo jumla ya viwanda vidogo 1,309 vinavyofanya shughuli mbalimbali hadi kufikia mwaka 2020/2021” alieleza RC Mahenge.Maadhimisho ya miaka 60 ya uhuru.pdf