MWENGE WA UHURU, WAPONGEZA MANISPAA SINGIDA KUJENGA KITUO CHA AFYA MTIPA

Kiongozi wa mbio za Mwenge wa Uhuru 2023, Abdalla Shaibu Kaim, ameipongeza Manispaa ya Singida, kwa kuunga mkono miradi ya maendeleo chini ya serikali ya awamu ya sita, baada ya halmashauri hiyo kutumia fedha za mapato ya ndani, zaidi ya Sh. Milioni 500/=, kujenga kituo cha afya Mtipa.   

Akizungumza baada ya kukagua maendeleo ya ujenzi wa kituo hicho cha afya, Kaim amesema ni jambo la furaha, kuona Manispaa ya Singida, imetumia mapato yake ya ndani, kuweza kutekeleza shughuli mbalimbali, ikiwemo miradi ya sekta ya afya, kwa lengo la kutatua kero za wananchi.

“Tumefanya ukaguzi wa nyaraka mbalimbali, tumetembela, tumekagua na kujiridhisha hatua ya maendeleo ya mradi huu, sabamba na kuangalia ubora na viwango vilivyofikiwa hadi hatua hii…napongeza sana juhudi za Manispaa kwa kutumia mapato yake ya ndani, kukamilisha kazi hii, pia Mkandarasi huyu kijana, amefanya kazi nzuri sana na hongereni kwa kazi hii nzuri,”amesema Kaim.

Mapema akisoma taarifa ya maendeleo ya ujenzi wa kituo hicho, kaimu mganga mkuu wa manispaa ya Singida, Dk. Hamisi Yuna, amesema hadi kukamilika kituo hicho cha afya, kinatarajia kugharimu Sh.Milioni 500/= na kuhudumia zaidi ya wananchi 12, 000 wa eneo hilo.

Ukiwa Manispaa ya Singida, Mwenge wa Uhuru umetembelea jumla ya miradi mitano na programu tano, huku miradi hiyo ikiwa na thamani ya Zaidi ya Sh. Bilioni 3.1/=, na unatarajiwa kuendelea na mbio zake wilayni Ikungi, mapema asubuhi, siku ya septemba 26, mwaka huu.