AFRIKA YAASWA KUBORESHA MIFUMO YA TAKWIMU KWA MIPANGO MADHUBUTI YA MAENDELEO

Posted on: November 29th, 2022

TANZANIA imeyataka Mataifa ya Afrika, kuboresha taratibu na mifumo ya ofisi za Takwimu, ili ziwe bora na zenye tija katika nyanja mbalimbali, ikiwemo sekta ya Kilimo, lishe na usalama wa chakula, kwa nchi husika.

Hayo yamebainishwa leo Novemba 29, mkoani Singida, na Waziri wa Fedha na Mipango, Dk. Mwigulu Nchemba, aliyewakilishwa na Naibu Waziri wa Kilimo, Anthony Mavunde, kwenye kilele cha maadhimisho ya Siku ya Takwimu Barani Afrika, yaliyofanyika kitaifa Mkoani Singida.

Amesema kuwa, maboresho ya mifumo ya Takwimu, iwapo yataboreshwa kwa kila nchi katika  Bara hili, itarahisisha katika utekelezaji wa mipango ya kimaendeleo na kutoa matokeo chanya kwa jamii.

“Kauli mbiu hii, inazitaka nchi za Afrika, ziboreshe mifumo ya Kitakwimu kuwa bora, iweze kuzalisha Takwimu za kilimo na kisasa, ili kuboresha sera za Kilimo, zitakazoleta Uhimilivu wa Kilimo, lishe na usalama wa chakula,” amesema Dk. Mwigulu kupitia Naibu Waziri wa Kilimo, Mavunde.

Naye Kamishna wa Sensa (2022), Anna Makinda, amesema Sensa ya mwaka huu iliyofanyika mwezi Oktoba, itawezesha Serikali kuandaa Mipango yake,ya Maendeleo, kutokana na idadi ya watu waliopo.

“Tufanye suala la Sensa liwe kweli, tuache kuamua tu mambo kwa mabavu, …. mtu mwenye mabavu fulani kupeleka kitu mahali, na kumbe wengine wanahangaika,” amesema Makinda.

Kuhusu vijana, Kamishna wa Sensa, amelitaka kundi hilo, kufanya kazi kwa bidii, juhudi na maarifa, kwa lengo la kujipatia maendeleo binafsi na Taifa kwa ujumla.

Kwa upande wake, Mkuu wa mkoa wa Singida Peter Serukamba amewakaribisha wawekezaji wa ndani na nje ya nchi kuja kuwekeza katika mkoa wa Singida kutokana na uwepo wa miundombinu bora na fursa nyingi za uwekezaji katika sekta za kilimo, viwanda, utalii na nishati.

Aidha amesema Mkoa wa Singida unatekeleza mipango yake kwa kupitia takwimu za za sensa ya watu na makazi ya mwaka 2022 ambapo mkoa unawatu wapatao 2,008,058 wakiwemo wanawake 1,012,355na wanaume 995,703.

Kauli Mbiu ya siku ya Takwimu Mwaka huu ni, ‘Kuimarisha mifumo ya Kitakwimu, kwa kutumia njia za kisasa katika uzalishaji na matumizi ya Takwimu za Kilimo ili kuboresha Sera kwa lengo la kuimarisha uhimilivu katika Kilimo, lishe na usalama wa chakula Afrika’.