BARAZA LA MADIWANI MANISPAA YA SINGIDA LAPITISHA TAARIFA YA HESABU KWA MWAKA WA FEDHA UNAOISHIA JUNI 30, 2022

Posted on: September 29th, 2022

BARAZA la madiwani, Manispaa ya Singida limeridhia taarifa ya hesabu za halmashauri kwa mwaka wa fedha unaoishia Juni 30, 2021/22 katika Mkutano wake maalumu, uliofanyika leo tarehe 29 Septemba, 2022 kwenye ukumbi wa shule ya sekondari Mwenge.

Taarifa hiyo ya hesabu za halmashauri ya Manispaa imejumuisha mizania ya hesabu ( |Statement of Financial Position) Taarifa ya Ufanisi ( Statement of financial performance), Taarifa ya mabadiliko ya mali halisi ( Statement in change of net asset), Mtiririko wa fedha ( Cash flow statement) na taarifa ya mlinganisho kati ya bajeti na uhalisia ( statement of comparison budget vs actal)

Akiongea baada ya kupitishwa kwa tarifa  hiyo, Mstahiki Meya wa Manispaa ya Singida Yagi Maulid Kiaratu amefafanua kuwa baraza la madiwani kupitia na kuridhia taarifa ya hesabu za halmashauri ni takwa la kiseria  na kikanuni na kwamba uandaaji wa taarifa hiyo umekuwa shirikishi baina ya wataalamu kutoka ngazi ya Manispaa, OR-TAMISEMI na Serikali kuu.

“ sina shaka na uandaaji wa taarifa hii kwani iko vizuri lakini napenda kuwapa ushauri wa kuipitia tena kabla ya kuikabidhi kwa CAG” aliasa Meya.

Ametaja kipengele cha utekelezaji wa miradi kuwa kimekuwa chini kutokana na miradi iliyopokea fedha kushindwa kukamilika kwa wakati kutokana na sababu mbalimbali na kutoa agizo kwa watalaamu kuhakikisha wanasimamia vyema fedha za miradi ili iweze kutekelezwa  kwa wakati na hivyo kuondoa uwezekano wa mapungufu wakati wa ufungaji wa hesabu lakini pia kuondoa hoja za ukaguzi.

Kuhusu suala la usimamizi wa sheria ndogo, Mhe Kiaratu amewata watendaji wa kata kusimamia vyema sheria ndogo hasa katika suala la ukusanyaji mapato  ili kuongeza makusanyo ya ndani na kufikia malengo kusudiwa.

Pamoja na hayo, amesisitiza kuhusu upimaji wa maeneo ya taasisi ili kuongeza thamani ya mali za halmashauri pia kuondoa migogoro inayoweza kujitokeza.

Kwa upande wake Katibu wa Chama cha Mapinduzi Wilaya ya Singida Mjini, Shaban Kalaghe  amepongeza kazi nzuri iliyofanywa na wataalamu ya kuandaa taarifa ya hesabu za Halmashauri kwa mwaka ulioishia Juni 30, 2022 na kusema kuwa taarifa hiyo imekidhi viwango.

Kalaghe aliwapongeza wajumbe wa baraza la madiwani na wataalamu  kwa kupitisha eneo lililopendekezwa kwa ujenzi wa ofisi mpya za Manispaa lililopo Mtaa wa Karakana Kata ya Misuna na kusema kuwa wamefanya maamuzi sahihi katika kuupanua mji.

Hata hivyo Kalaghe amesisitiza umuhimu wa kutumia rasilimali halisi     (Asset) ili kuleta maendeleo ya Manispaa kwa kuweka vitegauchumi ambavyo vitaongeza mapato ya ndani.

Naye Mkuu wa Wilaya Singida Mhandisi Paskasi Muragili amewataka wataalamu na waheshimiwa madiwani kusimamia fedha za miradi hasa za ujenzi wa madarasa ambazo tayari zimetolewa na serikali.

Muragili amesema kuwa kukamilika mapema kwa vyumba vya madarasa kutawezesha wanafunzi  watakao jiunga na elimu ya sekondari na msingi hapo mwakani kuwa na mazingira mazuri ya kujifunzia.