BARAZA LA MADIWANI SINGIDA MANISPAA LAPITISHA BAJETI

Posted on: February 10th, 2026

Baraza la Madiwani wa Halmashauri ya Manispaa ya Singida limepitisha bajeti ya mwaka wa fedha  2026/27, huku Mstahiki Meya wa Manispaa hiyo, Geofrey Mdama, akitoa wito kwa watendaji kuhakikisha ukusanyaji wa mapato unavuka malengo kwa zaidi ya asilimia 100 katika mwaka wa fedha 2025/26.

Akizungumza mara baada ya kupitishwa kwa bajeti hiyo, Mdama alisema ukusanyaji mzuri wa mapato ya ndani ni nguzo muhimu katika utekelezaji wa miradi ya maendeleo kuanzia ngazi ya chini hadi ngazi ya juu, akisisitiza kuwa mafanikio ya miradi hiyo yanategemea nidhamu na uwajibikaji wa watendaji.

Meya amesema hayo, leo Februari 10, 2026, katika Ukumbi wa Ofisi za Manispaa ya Singida, wakati wa kikao cha Baraza la Madiwani kilichopitisha bajeti ya mwaka wa fedha 2026/27, ambapo Halmashauri inatarajia kukusanya na kutumia jumla ya Sh bilioni 46.5.

Meya Mdama amesema endapo ukusanyaji wa mapato utaendelea vizuri na kufikia viwango vya juu, fedha hizo zitasaidia kwa kiasi kikubwa utekelezaji wa miradi mbalimbali ya maendeleo inayolenga kuboresha huduma kwa wananchi.

“Kwa kawaida Halmashauri yetu imekuwa ikifikia asilimia 100 ya ukusanyaji wa mapato, na huko nyuma tumefanikiwa kufanya hivyo. Safari hii tunapaswa kuhakikisha tunafanikisha lengo hilo tena kwa kushikamana na kila mmoja kuwajibika katika eneo lake. Tuna asilimia 60 ya mapato kwa ajili ya miradi ya maendeleo, hivyo nataka kuona juhudi zinazofanyika kama ambavyo huwa inafanyika katika utoaji wa mikopo ya asilimia 10 zinafanana na utekelezaji wa miradi tuliyowaahidi wananchi,” alisema Mdama.