BARAZA LA WAFANYAKAZI MANISPAA YA SINGIDA LARIDHISHWA NA MASLAHI YA WATUMISHIKUPITIA BAJETI YA MWAKA WA FEDHA 2023/2024

Posted on: January 25th, 2023

Baraza la Wafanyakazi la Manispaa ya Singida, limeridhishwa na uandaaji mzima wa Mpango na Bajeti ya mwaka wa fedha 2023/2024, iliyozingatia maslahi ya Watumishi wa Halmashauri hiyo.

Katika Kikao cha Baraza hilo lililokutana Januari 24, 2023, kwenye ukumbi wa Manispaa ya Singida, lilijumuisha Wajumbe 45, wakiwemo viongozi wa vyama vya Wafanyakazi ngazi ya Mkoa na Wilaya.

Wengine walioshiriki katika Baraza hilo ni, wawakilishi wa vyama kutoka sekta mbalimbali na wakuu wa idara na vitengo, ambao kwa pamoja waliwasilisha Bajeti zao, kwa ajili ya mwaka ujao wa fedha, 2023/2024.

Akiongea kwa niaba ya viongozi wa vyama hivyo, Kaimu Katibu wa Chama cha Walimu Mkoa, Mwl. Jones Madale, amesema Bajeti hiyo imeandaliwa kwa umakini, huku ikimjali Mtumishi ili atekeleze vyema majukumu yake.

“ Lazima tuwe wa wazi, Bajeti hii imemjali sana mtumishi, ukilinganisha na zile Bajeti zilizopita…..tunataka umakini kama huu wa mapendekezo ya Bajeti, hongereni sana kwa kazi nzuri,” amesema Madale.

Aidha Madale amepongeza uongozi mpya ulioleta mabadiliko chanya ya kiutendaji, hadi kufikia hatua ya kuimarisha uhusiano imara kati ya vyama vya Wafanyakazi, Watumishi na Uongozi wa Manispaa ya Singida.

“ Naamini uhusiano huu ninaouona sasa, hakika kuna uwezekano mkubwa sana wa kupunguza kero zenu mbalimbali zinazowakabili ninyi Watumishi,” alisema Madale.

Kwa upande wake Mwenyekiti wa Baraza hilo, Kaimu Mkurugenzi wa Manispaa ya Singida, Kulanga Matia Kanyanga, amewashukuru wajumbe kwa mawazo mazuri ya kuijenga Manispaa na kueleza kuwa, Manispaa ya Singida inatarajia kuwasilisha  rasimu ya motisha mbele ya Baraza hilo, kwa ajili ya kuridhia tayari kwa utekelezaji wa sera ya motisha.