BASHE: WAKULIMA WAPEWE MREJESHO WA TAFITI ZA KILIMO

Posted on: October 5th, 2022

Serikali Imeagiza matokeo ya tafiti za kilimo zinazofanywa na wataalamu, zirejeshwe kwa wakulima kwa ajili ya kuwawezesha wakulima, kutekeleza kilimo cha kisanyansi.

Hayo yamesemwa na Waziri wa kilimo Hussen Bashe wakati wa uzinduzi wa msimu wa kilimo kwa mwaka 2022/2023, katika mkoa Singida, Manispaa ya Singida.

Bashe amesema kuwa, wakulima wanachohitaji hivi sasa ni kuendesha kilimo chenye tija, ambacho kinawezekana kwa kupitia tafiti mbalimbali zitakazowezesha upatikanaji wa mbegu bora, matumizi ya pembejeo  na uwekezaji wa Miundombinu ya kilimo.

Amesema katika kuhakikisha wakulima wanapata huduma hizi, Serikali imetenga kiasi cha shilingi bilioni 80, kuwezesha kilimo cha ki-sayansi, kutoka Bilioni 16 zilizotengwa katika bajeti iliyopita (2021/2022).

“ Serikali ya awamu ya sita imedhamiria kufanya mapinduzi makubwa ya kilimo…mkulima asipopata taarifa za kitafiti  na kuzifanyia kazi, ni sawa na kazi bure”, amesema Bashe

Akielezea matumizi ya fedha hizo Waziri Bashe amesema kuwa, zitatumika kufanya tafiti mbalimbali za mbegu, kutengeneza mpango mkubwa na wa muda mrefu wa kilimo, kufanya uwekezaji katika Miundombinu ya umwagiliaji, na kubanisha kuwa mabwawa 13 yatajengwa katika mikoa 7.

Aidha Waziri Bashe amefafanua kuwa, fedha zingine zitawajengea uwezo maafisa ugani kielimu, kuwapatia vitendea kazi, ambavyo ni vishikwambi vitakavyounganishwa na mfumo wa usimamizi  wa shughuli za ugani na kupatiwa vifaa vya kupima ubora wa udongo kwa ajili ya kilimo.

Amesema Wizara yake tayari imepokea mahitaji ya mbegu bora za alizeti zinzohitajika katika mkoa wa Singida, mahitaji yakiwa ni jumla ya tani 500 zitakazosambazwa katika halmashauri saba za mkoa huo, kati ya tani 2,900 zinazotarajiwa kuzalishwa  kukidhi mahitaji ya nchi nzima.

Mkoa wa Singida ni kati ya mikoa wa kimkakati kwa zao la Alizeti na tayari tani 19 zimekabidhiwa kwa Halmashauri mbili leo na Waziri wa kilimo, ikiwemo Manispaa ya Singida iliyopata mgawo wa tani 4 na Halmashauri ya Wilaya ya Singida tani 15.

Awali mkuu wa mkoa wa Singida Peter Serukamba, alisema kuwa ili kuondoa umaskini kwa watanzania, uwekezaji katika kilimo ni muhimu, na akatumia fursa hiyo kumshukuru Rais Samia Suluhu Hassan, kwa kuwekeza katika kilimo cha ki-sayansi kinachozingatia tafiti na umwagiliaji.

Serukamba alimhakikishia Waziri wa kilimo kwamba Mkoa huo, umejipanga vema kuongeza maeneo ya kilimo, na ameagiza AMCOS kuhakikisha wanatoa elimu sahihi kwa wakulima kuhakikisha wanachama wao wanajisajili kwenye daftari la wakulima na baadae kupatiwa mbegu na mbolea za ruzuku.

Serikali imetoa nafuu kwa wakulima katika ununuzi wa mbegu bora na mbolea, ambapo wakulima watanunua mbegu hizo, kilo moja kwa Shilingi 5,000 na Mfuko wa mbolea kwa Shilingi 70,000.

Naye Mwenyekiti wa CCM Mkoa wa Singida Alhaji Juma Kilimba amemshukuru Rais wa Jamhuri ya Muungano wa Tanzania  kwa kuwekeza fedha nyingi katika bajeti ya wizara ya kilimo msimu huu 2022/2023, ili kuwezesha kilimo cha kimkakati na kisayansi chenye Tija.

Amesema Mkoa wa Singida ni mkoa wa wakulima hivyo wakulima hawanabudi kulima kitaalamu zaidi, kwani bila kilimo mkoa hauwezi kusonga mbele.