CHANJO YA SARATANI YA MLANGO WA UZAZI KWA WASICHANA ITOLEWE KWA UFASAHA - RC DENDEGO

Posted on: April 22nd, 2024

Mkuu wa Mkoa wa Singida, Halima Dendego amezindua rasmi zoezi la utoaji wa chanjo wa Saratani la mlango wa uzazi kwa wasichana mwenye umri kati ya miaka tisa hadi 14 huku akitoa agizo Kwa wahudumu wa Afya katika vituo vilivyoandaliwa kwa zoezi hilo, kutoa huduma hiyo wa weledi na kuhakikisha wasichana waliolengwa wanapata chanjo.

Dendego amezindua zoezi la utoaji wa Chanjo hiyo leo 22-Apr-2024 katika Kijiji cha Kisaki Manispaa ya Singida, na kubainishwa kuwa jumla ya wasichana 178,114 wanatarajiwa kuchanjwa.

Mkuu wa Mkoa amesisitiza kuwa chanjo hiyo pia ni muhimu iwafikie wanafunzi wanaosoma kwenye shule binafsi na watoto wa kike ambao wanaishi mitaani nao wapate fursa ya kupata chanjo hiyo ili kuwakinga na saratari na mlango wa uzazi.

“Tunapoenda kuwalinda watoto wa kike kwa kuwachanja chanjo hiyo maana yake tunawaepusha na madhara ugonjwa wa saratani ili wasije wakaambukiza wavulana”Ameeleza.

Aidha amesisitiza kuwa chanjo hiyo ni muhimu kwa wasichana na inatolewa bure kwa sababu Serikali kwa kushirikiana na Wadau wa maendeleo imegharamia chanjo hiyo, hivyo ni muhimu kwa wazazi na walezi kuwapeleka watoto wao kupata chanjo hiyo ili kuwaepusha na madhara yanayoweza kutokea.

Kwa upande wake Mganga Mkuu wa Mkoa wa Singida, Dkt Victorina Ludovick amesema kwa Tanzania chanjo ya saratani ya mlango wa kizazi (HPV) ilianza majaribio mwaka 2014 mkoani Kilimanjaro na kupata mafanikio makubwa kwa kuwakinga wasichana wasipate ugonjwa huo.

Dkt. Ludovick ameeleza kuwa mtu yeyote anaweza kuambukizwa saratani hiyo katika umri wowote ule hasa wakati wa tendo la ndoa na inaweza kusababisha magonjwa mengine ikiwemo saratani ya koo na magonjwa mengine ya via vya uzazi kwa wanawamke na wanaume.

Nae Katibu Tawala wa mkoa wa Singida Dkt Fatuma Mganga amewataka Maafisa Afya wanaotoa chanjo hiyo kuhakikisha wanafanikisha zoezi hilo kwa viwango ili Mkoa wa Singida uwe wa kwanza katika utoaji wa chanjo hiyo kwa wasichana mwenye umri wa miaka Tisa hadi 14.

Amesema saratani hiyo inaua na ni ugonjwa hatari hivyo ni muhimu kwa watoto wote wenye umri wa kupata chanjo wapewe chanjo hiyo .