CHONGOLO: TOENI USHAURI NA MAONI KUHUSU UWEKEZAJI WA BANDARI, UTAKAOBORESHA NA KULETA TIJA KWA TAIFA

Posted on: July 24th, 2023

Watanzania wametakiwa kutoa ushauri na maoni au  mapendekezo yanayohusu uwekezaji unaofanywa kwenye bandari ya Dar es Salaam, ambao utachukuliwa na kufanyiwa kazi, kwa ajili ya kulinufaisha taifa.

Katibu Mkuu wa Chama Cha Mapinduzi (CCM), Daniel Chongolo amesema hayo jana tarehe 23 Julai, 2023, kwenye Mkutano wa hadhara, wa kanda ya kati, uliohusisha mikoa mitatu ya, Singida Dodoma na Tabora.

Mkutano huo, ulilenga zaidi katika kuwajengea wananchi uelewa wa kutosha, kuhusiana na  manufaa ya uwekezaji, katika sehemu ya bandari ya Dar es Salaam, utakaotekelezwa na mwekezaji DP World ya Dubai, kutoka nchini Saudi Arabia.

Chongolo amesema, serikali kupitia wataalamu wake imefanya uchambuzi na mapitio ya kina na kujiridhisha pasipo shaka kwamba, uwekezaji huo, utaleta tija na kunufaisha Watanzania.

Aidha Katibu huyo amesema, uwekezaji huo ni utekelezaji wa ilani ya CCM ibara Na 22 na 59, zilizofafanua zaidi umuhimu wa kujenga mazingira ya kushirikisha sekta binafsi, katika kuboresha utendaji kazi, na bandari ya Dar es Salaam ikiwa sehemu husika.

Hata hivyo kupitia mkutano huo, Chongolo ametoa tahadhari dhidi ya kauli za kejeli zinazotolewa na baadhi ya watu, wanaopinga shughuli za uwekezaji nchini, na kuonya kuwa, Tanzania hivi sasa inahitaji uwekezaji zaidi, ili  kustawisha uchumi wake.

“Vita ya uchumi, ni suala nyeti na linalohitaji tahadhari kubwa, ili kuepuka kupoteza uwekezaji wa lazima hapa nchini,” amesisitiza Chongolo

Katika hatua ingine Chongolo amepongeza utekelezaji wa miradi ya maendeleo, unaofanywa na serikali Mkoani Singida, na kubainisha kuwa, mabadiliko yanayoonekana sasa kwa sekta ya elimu, afya, maji na barabara, ni matokeo ya utekelezaji wa ilani ya uchaguzi ya CCM ya mwaka 2020-2025.

Waziri wa nchi Ofisi ya Rais Mipango na Uwekezaji, Prof. Kitila Mkumbo, amesema mkataba wa bandari umezingatia sheria zote za uwekezaji  wa bandari ya Dar es Salaam na kwamba suala la mipaka na ulinzi, litabaki kuwa jukumu la msingi la serikali.

Kuhusu faida za uwekezaji huo Prof. Kitila amesema pato la nchi litokanalo na bandari litaongezeka kutoka Tsh. Trilioni 7.76 kwa sasa, hadi kufikia Tsh. Trilioni 26 mwaka 2032/2033, hivyo kuwezesha miradi mikubwa ya ndani ya nchi kutekelezwa kwa wakati, na midogo nayo kwa maendeleo na ustawi wa Watanzania.

Kwa upande wake Mkuu wa Mkoa wa Singida Peter Serukamba amempongeza Rais wa Jamhuri ya Muungano wa Tanzania Dkt. Samia Suluhu Hassan, kwa kuupatia Mkoa wa Singida fedha za kutosha kwa ajili ya kutekeleza miradi ya maendeleo, huku kwa kipindi cha miaka miwili, mkoa wa Singida umepokea fedha zaidi Tshs. Bilioni 437 sawa na asilimia 252 katika kipindi hicho.