DAWATI LA JINSIA LIFIKE MPAKA VIJIJINI

Posted on: March 6th, 2023

Wanafunzi wa kike katika shule ya sekondari Mwanamwema wameshauri serikali kupeleka huduma ya dawati la jinsia maeneo ya vijijini ambako wahanga wa unyayasaji wa kijinsia wanapatikana kwa wingi.

Wanafunzi hao wametoa pendekezo hilo leo tarehe 06/03/2023 katika mdahalo uliohusu binti wa kitanzania katika ulimwengu wa kidigitali, ulioendeshwa na Katibu Tawala Mkoa wa Singida, Mwl. Dorothy Mwaluko ambaye alikuwa mgeni rasmi katika mdahalo huo.

Wanafunzi hao wameeleza kuwa kuna kila sababu ya kupeleka huduma ya dawati la jinsia mpaka vijijini ili kuwasaidia wanawake na mabinti ambao ndiyo wahanga wakubwa wa unyanyasaji pamoja na udhalilishwaji kijinsia kutokana na mila na desturi za ukandamizaji.

Mabinti hao wa kidato cha kwanza mpaka cha sita, katika Shule ya Mwanamwema Shein, iliyopo Halmashauri ya Wilaya ya Singida wametaja mila kandamizi kwa wanawake zinazopaswa kuachwa ni pamoja na, kukosekana kwa uhuru wa maoni  na maamuzi kwa wanawake na mabinti, suala la mahari linaloondoa utu wa mwanamke na hasa mtoto wa kike, mwanamke kuchukuliwa kama chombo cha starehe na wanawake kunyimwa haki ya urithi.

Katibu Tawala Mkoa, Mwaluluko, amewaasa mabinti hao kuwa chachu ya mabadiliko katika jamii, na kuwataka kuwa na ujasiri utakaowawezesha kujisimamia ili kuiwezesha jamii kuondokana na dhana iliyojengeka kuwa mwanamke ni dhaifu.

Mwaluko pia alitumia fursa hiyo kuwaasa mabinti hao kutojihusisha na masuala ya mapenzi wakiwa shuleni huku akiwataka kuepuka vishawishi mbalimbali kama lift wakati wa kwenda shule na zawadi kutoka kwa vijana na watu wenye tamaa.

Martha Gwau, Mbunge wa viti maalum mkoa wa Singida ni miongoni mwa viongozi waliofika shuleni hapo kusikiliza mdahalo huo ambao ulihamashisha wazazi na viongozi mbalimbali.

Mbunge huyo aliamsha msisimko kwa mabinti baada ya kutoa ushuhuda ulio hai wa safari ya maisha yake hata kufikia hapo alipo sasa, na kuongeza kuwa mafanikio aliyofikia ni kutokana na kujithamini na kujituma na hata  kufikia malengo yake.

Gwau pamoja na kuongea na wanafunzi alipata pia  nafasi ya kutoa zawadi kwa wanafunzi hao. Wengine waliopeleka zawadi kwa wanafunzi ni Chama cha Walimu Tanzania Mkoa wa Singida wakiongozwa na Bi. Digna Nyaki , Katibu wa CWT Mkoa.