DC GONDWE AWAPONGEZA, WAFANYABIASHARA,AHAIDI SERIKALI ITAENDELEA KUTOA ELIMU YA MANUNUZI, ULIPAJI KODI

Posted on: February 12th, 2025

Mkuu wa Wilaya ya Singida, Mhe. Godwin Gondwe, amewapongeza wafanyabiashara wa wilaya hiyo kwa juhudi zao katika kuendeleza biashara na kuchangia mafanikio ya mkoa, huku akiwataka wataalam kutoka Serikalini kuendelea kutoa elimu kuhusu mfumo wa manunuzi wa NeST na ulipaji wa kodi.

Mhe. Gondwe ametoa pongezi hizo leo Februari  12, 2025 wakati wa ufunguzi wa Baraza la Biashara la Wilaya ya Singida, ambalo limefanyika katika Ukumbi wa Jalmin Hoteli, Manispaa ya Singida. 

Baraza hilo linalojumuisha wafanyabiashara, taasisi za serikali, sekta binafsi, pamoja na wataalam kutoka Halmashauri ya Manispaa ya Singida na Wilaya ya Singida, lengo lake ni kuboresha mazingira ya biashara na kujenga ushirikiano mzuri kati ya wafanyabiashara na Serikali.

Akiwahutubia washiriki wa Baraza hilo, Mhe. Gondwe alisema kuwa wafanyabiashara wa Wilaya ya Singida wamekuwa chachu ya mafanikio ya mkoa huo, na kwamba wanastahili kupongezwa kwa juhudi zao katika kuendesha biashara na kushirikiana na Serikali katika ukusanyaji wa mapato. Alisisitiza kuwa wafanyabiashara wamekuwa na mchango mkubwa katika uchumi wa wilaya hiyo na mkoa kwa ujumla.

"Nawapongeza wafanyabiashara wa Wilaya ya Singida kwa namna wanavyofanya kazi nzuri na namna ambavyo wamekuwa wakishirikiana na Serikali katika ukusanyaji wa mapato," alisema Mhe. Gondwe.

Pamoja na pongezi hizo, Mhe. Gondwe aliongeza kuwa Serikali imekuwa ikifanya juhudi kubwa kuhakikisha kuwa wafanyabiashara wanapata mazingira bora ya kufanya biashara. Alizitaka idara na vitengo husika kutoa elimu ya kutosha kwa wafanyabiashara kuhusu matumizi ya mfumo wa manunuzi wa NeST (National e-Procurement System) na ulipaji wa kodi, ili kuongeza ufanisi katika biashara na michakato ya manunuzi serikalini.

“Tunawaomba wataalam kutoka Serikalini kuendelea kutoa elimu kwa wafanyabiashara kuhusu mfumo huu wa NeST pamoja na namna ya kulipa kodi, kwani elimu hii itawawezesha wafanyabiashara kufanyakazi zao kwa ufanisi na kwa kuzingatia sheria,” alisisitiza Mhe. Gondwe.

Baraza hilo la biashara limekuwa  likitoa  fursa kwa wafanyabiashara kupata majibu ya haraka kuhusu changamoto zinazowakabili na kuongeza ushirikiano kati ya sekta binafsi na Serikali, jambo linaloendelea kufanikisha utekelezaji wa miradi ya maendeleo katika Wilaya ya Singida.