DENDEGO APONGEZA MIRADI YA MAENDELEO MANISPAA YA SINGIDA

Posted on: March 26th, 2024

Mkuu wa Mkoa wa Singida Halima Dendego, amepongeza utekelezaji mzuri na usimamizi makini wa miradi ya maendeleo ulizingatia viwango vyenye ubora  katika Manispaa ya singida.

Dendego alitoa pongezi hizo Machi 26, 2024 alipofanya ziara ya kushtukiza katika baadhi ya miradi ya maendeleo kwenye Manispaa ya Singida na kuweza kujionea miradi ikiwa imekamilika na mingine ikiendelea na utekelezaji.

Miradi iliyotembelewa ni ile iliyotekelezwa kwa fedha za Serikali Kuu pamoja na fedha za mapato ya ndani ambayo ni Kituo kipya cha afya Mtipa  kilichojengwa kwa fedha za mapato ya ndani, Mradi wa miji 28 wa ujenzi wa mabwawa ya maji taka kupitia Mamlaka ya Maji safi na Usafi wa Mazingira (SUWASA), Ujenzi wa nyumba pacha ya watumishi shule ya Sekondari Uhamaka, na ukamilishaji wa zahanati ya Ititi.

Mkuu wa Mkoa pamoja na kupongeza amemtaka mkandarasi wa ujenzi wa mabwawa ya maji taka kuhakikisha anajenga kwa ubora wa hali ya juu ili kuepuka ukarabati wa mara kwa mara baada ya mradi kukamilika.

Pamoja na mradi huo wa mabwawa amepongeza pia mradi wa ujenzi wa nyumba ya mtumishi sambamba na shule mpya ya sekondari ya uhamaka na kusema uzuri wa majengo uendane na kupanda kwa kiwango cha ufaulu.

“Nawapongeza kwa ujenzi wa shule wenye layout nzuri, endeleeni kuipendezesha kwa mandhari mazuri lakini pia hakikisheni wanasoma kwa bidii ikibidi adhabu ndogondogo zitolewe ili kuwaweka wanafunzi katika mstari ili kuinua ufaulu”, amesema Dendego.