ELIMU YA CHANJO ITOLEWE KWA JAMII ILI KUIKINGA NA MAAMBUKIZI YA MAGONJWA MBALIMBALI.

Posted on: April 24th, 2023

Wananchi wa Manispaa ya Singida wametakiwa kuzingatia chanjo kwa watoto wote walio na umri chini ya miaka mitano kutokana na umuhimu wake katika kudhibiti maambukizi ya magonjwa mbalimbali.

Hayo yameelezwa na Mkuu wa wilaya ya Singida Mhandisi Paskasi Muragili wakati akizindua wiki ya chanjo kitaifa sambamba na kuweka jiwe la msingi katika zahanati ya Mtaa wa Isomia kata ya Mwankoko ambayo ni miongoni mwaka Kata zilizoko pepmbezoni mwa mji.

Mkuu wa Wilaya amehimiza wananchi wote wenye watoto wa umri chini ya miaka mitano kuhakikisha watoto hao, wanapata chanjo zote zinazostahili pamoja na mabinti wenye umri wa miaka 9 - 14 ambao wanapaswa kupata chanjo ya kuwakinga na saratani ya mlango wa kizazi.

“ niwahimize wananchi kupeleka ujumbe huu kwa jamii yote ili watoto waweze kupata chanjo zote stahiki… bila kuwasahau mabinti wenye umri wa miaka 9 - 14 ambao wanapaswa kupata chanjo ya kuwakinga na saratani ya mlango wa kizazi” amesisitiza Muragili na kuongeza kuwa, chanjo hizi ni bure na zinatolewa katika vituo vyote vya kutolea huduma za afya.

Mhandisi Muragili amewataka wananchi kuondakana na dhana kuwa chanjo hizo zina madhara na kusisitiza kuwa chanjo zote zimefanyiwa utafiti wa kutosha kabla ya kuingizwa katika matumizi. Amesema chanjo zilianza miaka ya sabini ambazo zimeweza kuikinga jamii na maradhi mbalimbali yakiwemo ya ndui, surua, polio,kifua.

Mkuu wa wilaya katika kuhimiza umuhimu wa chanjo amemwagiza Mganga Mkuu wa Manispaa pamoja na timu yake kuweka ratiba ya kliniki kila wiki katika Mtaa wa Isomia kwa ajili ya watoto na wajawazito wakati kazi za ukamilishaji mradi wa zahanati hiyo ukiendelea na kwamba ifikapo Juni 30 atafika kwa ajili ya kukabidhiwa mradi.

Pamoja na uzinduzi huo, Mkuu wa wilaya ya Singida Mhandisi Muragili ameweza kuweka jiwe la msingi katika zahanati mpya ya Mtaa wa Isomia iliyojengwa kwa nguvu za wananchi  pamoja na serikali.

Akisoma taarifa ya ujenzi wa Mradi huo wa zahanti, Kaimu Mganga Mkuu wa Manispaa, Dr. Hamis Yuna, amesema mradi huo ukikamilika utaweza kutoa huduma kwa wamama wajawazito na watoto katika jamii ya Isomia, lakini pia kupunguza vifo vya wanawake wajawazito na watoto pamoja na kupunguza umbali wa kufuata huduma ambao ni zaidi ya kilometa 6 hadi kufika zahanati ya  Mwankoko.

Dr. Yuna Amesema mradi huo hadi sasa umetumia zaidi ya  Tshs, Milioni 60 ambapo jumla ya wakazi 1,452  wa Mtaa wa Isomia watanufaika na mradi huu kati ya wananchi  7,624 wa kata  ya Mwankoko.

Pamoja na uwekaji wa jiwe la msingi Mgeni Rasmi Mhandisi Muragili aliweza pia kuendesha zoezi la upandaji miti ambapo vingozi mbalimbali wa chama na serikali pamoja na wananchi wameweza kupanda miti zaidi ya 60.

Manispaa ya Singida imeweza kufanya shughuli mbalimbali za kijamii ikiwemo usafi wa mazingira, kutembelea na kuweka jiwe la msingi katika moja ya miradi ya maendeleo, kupanda miti, uzinduzi wa chanjo, uchangiaji wa damu salama na mdahalo uliohusisha shule za sekondari ikiwa ni maadhimisho kuelekea kilele cha sherehe za miaka 59 ya Muungano wa Tanganyika na Zanzibar