GEOFREY MDAMA:NAIBU MEYA MPYA MANISPAA YA SINGIDA 2023/2024

Posted on: August 14th, 2023

BARAZA la Madiwani katika Manispa ya Singida, limemchagua diwani wa Kata ya Unyianga, Geofrey Mdama, kuwa Naibu Meya mpya wa halmashauri hiyo, kwa kipindi cha mwaka wa fedha 2023/2024, akichukua nafasi ya diwani wa Kata ya Mungumaji, Hassan Mkata.

Mdama, aliyekuwa mgombea pekee, ameshinda kwa kura zote za ndiyo, kutoka kwa madiwani 24 wa halmashauri ya manispaa ya Singida, hivyo kupata ridhaa ya kuongoza nafasi nafasi yake, kwa kipindi cha mwaka mmoja.

Nafasi hiyo awali ilikuwa inaongozwa na diwani wa Kata ya Mungumaji, Hassan Mkata, tangu mwaka 2020, kabla ya kumaliza muda wake na kumpisha naibu meya huyo mpya, ambaye ni diwani wa Kaya ya Unyianga, Mdama.

“Kipekee nikushukuru sana Mstahiki Meya wa Manispaa ya Singida, Chama Cha Mapinduzi, Mwenyekiti na Katibu, waheshimiwa madiwani wote, wakuu wa vitengo na divisheni, ahsanteni sana, naahidi kuwatumikia,”amesema Mdama.

Naibu meya huyo ameahidi kuwatumikia kwa haki bila ya ubaguzi madiwani na wananchi, kwa kushirikiana na serikali na wadau mbalimbali, ameahidi kuipaisha Manispaa katika maendeleo yaliyokusudiwa, kulingana na mipango iliyoandaliwa.

Awali Mwenyekiti wa uchaguzi huo, ambaye pia ni Mstahiki Meya wa Manispaa ya Singida, Yagi Maulidi Kiaratu, alimpongeza Naibu Meya mpya, kwa kushinda nafasi hiyo, na kumtakia kila la heri katika majukumu yake mapya ya kuwatumikia wananchi.

Aidha Mstahiki Meya, alitumia nafasi hiyo kumshukuru aliyekuwa naibu Meya (Mkata), kwa utumishi wake uliotukuka  kwa kipindi chote cha uongozi wake, aliodai alimsadia sana Mstahiki Meya katika kutekeleza kazi za kila siku.

“Ulipokuwa msaidizi wangu, ulitumia nafasi yako vizuri na kwa kweli ulinisaidia sana, ahsante sana kwa busara zako, naomba uendelee kumsaidia Naibu Meya mpya, pale atakapohitaji msaada wako,”alisema Mstahiki Meya.

Baraza hilo liliofanyika jana kwenye ukumbi wa sekondari ya Mwenge, pia lilichagua wajumbe wa kamati mbalimbali kwa kipindi cha mwaka wa fedha 2023/2024, ikiwemo kamati ya fedha, huduma za jamii, Ukimwi, maadili na ile ya mipango miji na mazingira.