HALMASHAURI ZA MKOA WA SINGIDA ZA PONGEZWA KWA KUVUKA MALENGO YA UKUSANYANJI MAPATO 2023/2024

Posted on: July 31st, 2024

Mkuu wa Mkoa wa Singida, Mhe. Halima Dendego amezipongeza Halmashauri za mkoa huo kwa kufanya vizuri katika eneo la ukusanyaji mapato na kuvuka lengo lililowekwa kwa mwaka wa fedha 2023/2024.

Mkuu wa Mkoa ametoa pongezi hizo Julai 30, 2024 wakati akifungua kikao cha Kamati ya Ushauri ya Mkoa (RCC) ambapo alisema malengo hayo yamefikiwa kutokana na mipango na mikakati madhubuti ikiwemo uanzishaji wa vyanzo vipya vya mapato na ushirikiano mzuri kati ya Watendaji na Viongozi wao.

“Nawapongeza kwa hatua hizi mlizochukua kwa kuvuka malengo katika ukusanyaji wa mapato ongezeni bidii zaidi katika ukusanyaji, Amesisitiza Dendego.

Pamoja na pongezi hizo Mhe. Dendego ameishukuru Serikali Kuu kwa kuupatia mkoa wa Singida Tshs. Bilioni 241 sawa na asilimia 105 hadi kufikia Juni mwaka huu kwa ajili ya shughuli za utawala na utekelezaji wa miradi mbalimbali ya maendeleo.

Amesema Rais Dkt. Samia Suluhu Hassan, amevunja rekodi ya kuupatia mkoa wa Singida fedha nyingi za miradi ya maendeleo ikilinganishwa na miaka mingine ambapo katika mwaka wa fedha wa 2022/2023 mkoa iliidhinishiwa zaidi ya Bilioni 230 lakini umepewa fedha zaidi ya bilioni 241 kwa ajili ya utekelezaji wa miradi mbalimbali ya maendeleo.

Kuhusu utekelezaji wa miradi mbalimbali ya umwagiliaji katika mkoa wa Singida, Mkuu wa MKoa amesema, miradi hiyo inaendelea vizuri ukiwemo mradi wa skimu ya umwagiliaji ya Mkalama na Msange katika Halmashauri ya wilaya ya Singida kwa gharama ya zaidi ya shilingi bilioni 55.

Amesema Serikali inaendelea kukarabati na kujenga miradi mipya ya umwagiliaji ili kuongeza tija katika uzalishaji wa mazao ya chakula na biashara.

Kikao cha Kamati ya Ushauri cha Mkoa (RCC) kililenga Ukusanyaji Maoni kuhusu Dira ya Taifa ya Maendeleo 2025.