“HUDUMIENI WANANCHI KWA WAKATI NA HAKI” - SILAA

Posted on: October 10th, 2023

Serikali imewataka watumishi wa Idara ya ardhi kuongeza kasi ya kutoa huduma kwa wananchi kwa wakati na kwa kutenda haki ili kupunguza malalamiko na migogoro.

Agizo hilo limetolewa leo Oktoba 10, 2023 na Waziri wa Ardhi, Nyumba na Maendeleo ya Makazi, Jerry Silaa katika kikao na watumishi wa Sekta ya Ardhi, Mkoa wa Singida kilichofanyika katika Ukumbi wa Ofisi ya Mkuu wa Mkoa Singida.

Silaa amewapongeza watumishi wa Sekta ya Ardhi pamoja na Shirika la Nyumba la Taifa Mkoa wa Singida katika ziara yake maalum ya kutembelea mikoa yote ya Tanzania kwa ajili ya kutambuana na maafisa ardhi nchini kote na kutoa maagizo maalum.

"Naipongeza Singida wanafanya kazi nzuri, watumishi wanajituma na ninaomba waendelee kufanya kazi kwa uadilifu mkubwa.Pia Shirika la Nyumba la Taifa wanatakiwa kuongeza kasi katika uwekezaji Mkoa wa Singida.”

Silaa alisema nataka kuhakikisha Sekta ya Ardhi nchini inakuwa bora na kutokuwa na migogoro kwa kuhakikisha wananchi wanakuwa hawana kero katika masuala yote yahusuyo Ardhi.

Watumishi wanatakiwa kuendana na kasi ya sasa, urasimu na kutotenda haki visipewe nafasi. Na kwa sasa jambo kubwa ni kuhakikisha mpango wetu wa Kupanga,kupima na kukamilisha (KKK) unafanikiwa kwa asilimia zote na kuwa na mfumo wa kisasa nchini  ambao utajibu matatizo yote ya ardhi ili kuepusha migogoro.

Kikao hicho kilijumuisha watumishi wa Sekta ya ardhi wa Halmashauri zote saba za mkoa wa Singida, Kamishna wa Baraza la Ardhi na Meneja wa Shirika la Nyumba la Taifa (NHC).