JAMII YAHIMIZWA KUWAPELEKA SHULE WATOTO WENYE ULEMAVU ILI WAPATE ELIMU

Posted on: February 20th, 2023

Jamii imeaswa kuacha tabia ya kuficha watoto walemavu majumbani na badala yake wawapeleke  shuleni na katika vituo maalum ili waweze kuapata elimu pamoja na kuchangamana na wezao hali itakayowezesha kukuza uelewa wao.

Hayo yameelezwa na Mwalimu Mkuu wa Shule maalumu ya wenye ulemavu wa kusikia ( Viziwi), Francis Edward, ambaye amesisitiza kuwa  ni wakati sasa wa jamii kuelewa umuhimu wa elimu kwa wenye ulemavu kama ilivyo kwa watoto wasio na ulemavu kwani  walemavu wakipewa elimu nao wanaweza kama watoto wengine.

Akitoa takwimu za uandikishaji shuleni hapo, Mwalimu Mkuu huyo amesema, shule ya Msingi Tumaini viziwi ,  imevuka lengo mwaka huu 2023 kwa kuandikisha wanafunzi kumi wenye ulemavu wa kusikia, ikilinganishwa na watano waliosajiliwa mwaka jana (2022).

Mwalimu Edward, amesema kuwa, ongezeka hilo limeushawishi uongozi wa shule ya Tumaini viziwi, kuongeza zaidi muda wa usajili wa wanafunzi wapya, hadi Machi 31, mwaka huu, ndipo wakati dirisha litakapofungwa.

Wakiongea kwa nyakati tofauti baadhi ya walimu wa shule hiyo, wamesema  mbinu shirikishi ya  kujifunza na kufundishia ya “K” tatu, yaani Kusoma, Kuandika na Kuhesabu (KKK), imekuwa na mafanikio, ikilinganishwa na miaka ya nyuma.

“Wanafunzi wanaweza kusoma kwa urahisi kuhesabu na kuandika kwa kuwa mbinu hii ni shirikishi zaidi, amesema  Mwalimu Lucy Masawe anayefundisha darasa la awali, ambaye amejivunia baadhi ya wanafunzi wake kutamka maneno jambo ambalo halikuwezekana hapo awali.

Nao wanafunzi wa shule hiyo, wakiwakilishwa na wenzao, Hadija Habibu na Samwel Matonya, wameishukuru serikali kwa kutoa elimu maalumu bure, na kumwomba Mheshimiwa Rais wa Jamhuri ya Muungano wa Tanzania,  Dkt. Samia Suluhu Hassan, kuongeza walimu watakaotosheleza mahitaji yao.

Shule ya Msingi Tumaini Viziwi, ni shule ya wanafunzi wenye ulemavu wa kusikia  pekee katika  Manispaa ya Singida, inayimilikiwa na serikali, huku ikiwa na jumla ya idadi ya wanafunzi 92, wakiwemo wasichana 37 na wavulana 55, wenye ulemavu wa kusikia, wakiwemo pia wenye ulemavu zaidi ya moja.