JENGENI UMOJA NA USHIRIKIANO KUDHIBITI UHALIFU

Posted on: April 25th, 2024

MWENYEKITI wa Kamati ya Usalama ya Wilaya ya Singida, Godwin Gondwe amewataka wamiliki wa makampuni ya ulinzi wilayani Singida kuendeleza ushirikiano na vyombo vya usalama vya serikali kwani jukumu la ulinzi ni la pamoja.

Gondwe amesema hayo katika kikao cha pamoja na wamiliki hao kilichofanyika leo Aprili 25, 2024 ofisini kwake, ambapo amesisitiza makampuni hayo kuzingatia maadili ya kazi za usalama katika malindo wanayokabidhiwa.

“… nataka kuona mnajenga utaratibu wa kuzungukia malindo yenu ili kujua kinachoendelea…hakikisheni walinzi wenu wanazingatia maadili ya kazi”, amesisitiza Gondwe.

Aidha Gondwe amewashauri wamiliki hao wa makampuni ya ulinzi kuajiri walinzi waliopitia mafunzo ya ulinzi na usalama kupitia jeshi la akiba kwani mafunzo wanayopata yanawafanya kuwa wakakamavu pia kuwa na mbinu mbalimbali za ulinzi.

Amesema ofisi yake inaratibu kanzidata ya wahitimu wa jeshi la akiba hivyo kuwasisistiza wamiliki hao wa makampuni ya ulinzi kuwasilisha maombi kwa ajili ya kupata vijana waliohitimu mafunzo lakini wenye umri stahiki kwa kazi hizo.

Kuhusiana na malalamiko ya baadhi ya makampuni kuhusu kutolipwa fedha zao za ulinzi, Gondwe ameyataka makampuni yaliyodhulumiwa fedha zao kujiorodhesha na kuwasilisha kwake ordha ya wadaiwa na kusisitiza kuhakikisha kila mmiliki anakuwa na mikataba mizuri ili kuepuka kupoteza haki zao.