JUMANNE SUFEI: UFANISI WA MAJUKUMU, KUJITUMA NA UZALENDO NDIYO MSINGI WA MAFANIKIO YAKE KAZINI

Posted on: February 23rd, 2023

Uzalendo,kujituma ufanisi wa majukumbu ni sifa ambazo zimetawala jina la mtumishi , Jumanne Sufei, Mtunza kumbukumbu msaidizi, katika Halmashauri ya Manispaa ya Singida ambaye ameibuka kuwa mtumishi hodari kwa mwezi January, 2023.

Huu ni  mwendelezo wa Halmashauri ya Manispaa ya Singida wa  kuwamotisha watumishi wake kila mwezi ambao wanafanya vizuri zaidi ya wengine ( extra ordinary) na hivyo kuleta tija kwa Manispaa.

Mkuu wa Idara ya Utumishi na Utawala, Kulanga Matia Kanyanga, alimtangaza mtumishi huyo kuwa mshindi kati ya watumishi watatu walioshindanishwa kutoka sekta mbalimbali na Sufei kuibuka mshindi.

Akimkabidhi cheti na Picha , Kaimu Mkurugenzi wa Manispaa Dr. Adrian Kalekezi amesema utii na nidhamu ya kazi aliyonayo mtumishi huyo alistahili tuzo hiyo na kuwataka watumishi wengine kuiga mfano wake.

“ nyie wenyewe ni mashahidi, jina la Sufei lilipotangazwa kila mtu ameshangilia kwa furaha…. Ni kutokana na kujituma na nidhamu ya kazi aliyonayo” amesema Kalekezi.

Akitoa shukrani zake kwa Mkurugenzi na timu ya menejimenti, Sufei, amesema msingi wa mafanikio yake ni nidhamu katika kazi, uzalendo, na ufanisi wa majukumu anayotekeleza.

Aidha amewaasa watumishi wote kufanya kazi kwa kushirikiana kama mchwa ili kufikia malengo ya taasisi ya kutoa huduma kwa wananchi, na kulitanganza vyema jina la Manispaa.

“ …pamoja na shukrani zangu …tuzingatie nidhamu katika kazi, juhudi binafsi na kufanya kazi kwa ushirikiano kama mchwa ili tujenge kichuguu imara…..”, ameasa Sufei

Nae Msimamizi wa ofisi (OS), Bi. Veronica Kikwesha amesema, tuzo hiyo ni kiashiria cha umuhimu wa ofisi ya masijala inayotunza kumbukumbu za halmashauri.

Amesema nidhamu katika kazi ni msingi mkubwa kwa watunza kumbukumbu kwani kinyume cha hapo shughuli mbalimbali za taasisi zinaweza kusimama.

Akiongea kwa niaba ya viongozi wa vyama vya wafanyakazi, Kaimu Katibu wa TALGWU Mkoa, Bi Juliana Muyenjwa , amepongeza Manispaa kwa kuwamotisha watumishi, na kwamba amekuwa balozi mzuri wa kuhamasisha halmashauri zingine ziige mfano wa manispaa.

Amesema TALGWU inaunga mkono zoezi hilo na kwamba watumishi wote ambao wapata tuzo za watumishi hodari wa mwezi na  ambao ni wanachama wa TALWGU, chama kitawashika mkono wa pongezi.

Akitoa neno kwa niaba ya timu ya menejimenti, Mkuu wa Kitengo cha Maliasili, Jacob Chibuga, amesema, utaratibu huu wa motisha kwa watumishi, unatoa nafasi kwa watumishi kujipima na kujua wapi waongeze bidii, na kuwataka watumishi kuiga mfano wa mtumishi huyo hodari wa mwezi, ambaye anajali kazi  na kutumia muda wa ziada kukamilisha majukumu yake.