KAMATI YA FEDHA NA UTAWALA MANISPAA YA SINGIDA IMEHIMIZA USIMAMIZI MADHUBUTI WA MIRADI YA MAENDELEO KUEPUSHA UDANGANYIFU

Posted on: February 23rd, 2023

Kamati ya Fedha na Utawala Manispaa ya Singida, imehimiza suala la usimamizi madhubuti wa miradi ya maendeleo ili kuepusha udanganyifu unaweza kufanywa na mafundi na hivyo kufanya miradi kutekelezwa chini ya kiwango.

Wajumbe wa kamati hiyo, wakiongozwa na Mstahiki Meya wa Manispaa ya Singida, Yagi Maulid Kiaratu, ambaye ni mwenyekiti wa Kamati hiyo, leo tarehe 23 Februari, 2023, imefanya ziara katika miradi mbalimbali ya maendeleo na kusisitiza kufanyika kwa ziara za usimamizi mara kwa mara ili kuhakikisha miradi inatekelezwa kwa kiwango kwa kuzingatia thamani ya fedha.

Aidha, Mstahiki Meya amewaasa wananchi wa kijiji cha Manga waliokuwepo eneo la shule, kujitokeza na kuchangia shughuli za maendeleo ili kuwezesha miradi iliyoanzishwa kwa nguvu za wananchi kukamilika kwa wakati hasa mradi wa ujenzi wa vyumba 04 vya madarasa ambavyo tayari vimepauliwa kwa fedha za mapato ya ndani ya Manispaa.

“… tushirikiane kukuchangia ukamilishaji wa madarasa haya ili mwakani wanafunzi wapate vyumba vya kusomea… msikubali kudanganywa na watu wanaotaka msichange…miradi itakwama na nguvu zitakuwa zimepotea bure”, ameasa Mstahiki Meya.

Shule ya sekondari Maharu, ni shule mpya iliyoanza kujengwa kwa nguvu za wananchi, imefunguliwa January , 2023 ikiwa na walimu 06 na wanafunzi 166. Uwepo wa shule hii umesaidia kupunguza umbali wa kutembea kwa wanafunzi wanaotoka kijiji cha Manga na Nyunjwi na hivyo kupunguza utoro shuleni kwa kiasi  kikubwa.

Kamati hiyo pia imeweza kutembelea miradi mingine (03) ikijumuisha Mradi wa Ujenzi wa kituo kipya cha afya cha Kata ya Mtipa kinachojengwa kwa mapato ya ndani ya Halmashauri, Kituo cha Afya cha Kata ya unywambwa kinachojengwa kwa fedha za serikali kuu pamoja na mradi wa ujenzi wa jengo la utawala la Manispaa ya Singida, eneo la Karakana Kata ya Misuna. Miradi hii 03 ipo katika hatua mbalimbali za utekelezaji.