KAMATI YA MAENDELEO WILAYA YAKAGUA NA KUTEMBELEA WANAFUNZI WAKE

Posted on: February 8th, 2026

Kamati ya Maendeleo ya CAMFED Wilaya ya Singida ( Singida Manispaa) imeendelea na ziara zake za kukagua utekelezaji wa miradi pamoja na kuwatembelea wanafunzi wa kike wanaofadhiliwa na Shirika la CAMFED, wakiwemo wanafunzi wenye uhitaji maalum wa kielimu na kijamii.

Katika ziara hiyo, wajumbe wa kamati walitembelea shule mbalimbali za sekondari zikiwemo Mtipa, Senge Mughanga, Kimpungua, Dr Salmin na Mitunduruni, ambako walipata fursa ya kuzungumza moja kwa moja na wanafunzi hao ili kusikiliza changamoto zao na mafanikio wanayopata kupitia ufadhili huo.

Aidha, kamati hiyo ilifanya ukaguzi wa miundombinu ya shule, ikiwemo matundu ya vyoo katika Shule ya Sekondari Mitunduruni, kwa lengo la kuhakikisha mazingira ya kujifunzia yanakuwa salama, rafiki na yenye kuzingatia afya na utu wa wanafunzi wa kike.

Mbali na hilo, wajumbe wa kamati walihakikisha kuwa wanafunzi wanaonufaika na ufadhili wa CAMFED wanapata stahiki zao ikiwemo nauli ya kwenda na kurudi shule pamoja na huduma ya chakula, hatua inayolenga kupunguza vikwazo vya mahudhurio na kuongeza ufaulu wao kitaaluma.