KAMATI YA SIASA YA MKOA WA SINGIDA YATEMBELEA MIRADI YA MAENDELEO - UVIKO 19

Posted on: January 19th, 2022

Kamati ya siasa ya Mkoa wa Singida leo January 19, 2022 imeanza ukaguzi wa miradi ya maendeleo inayotekelezwa kupitia fedha za UVIKO 19 pamoja na fedha za tozo ikiwa ni sehemu ya utekelezaji wa ilani ya CCM inayotekelezwa mpaka mwaka 2025.

Akiongoza ziara hiyo Mwenyekiti wa CCM Mkoa wa huo Alihaj Juma Kilimba alisema lengo la ziara hiyo ni kukagua hali ya utekelezaji wa ilani ya chama kupitia fedha za UVIKO19 ambazo zimetumika katika ujenzi wa vyumba vya madarasa na vituo vya afya sehemu mbalimbali mkoani hapa

Aidha, akiongea wakati wa ziara hiyo Alhaji Juma Kilimba ameshukuru viongozi mbalikmbali wa Chama na Serikali kwa usimamizi madhubuti wa ujenzi wa vyumba hivyo na kuwakumbusha kwamba walipewa fedha hizo kwa kuwa waliaminiwa na serikali ili kusimamia maendeleo kwa wananchi jambo ambalo amelitaka kuendelezwa.

Hata hivyo Mwenyekiti huyo akatoa wito kwa wazazi na walezi kuhakikisha watoto wanakwenda shule kwa kuwa tayari kila shule ina vyumba vya madarasa na madawati ya kutosha huku akiwataka walimu kuongeza juhudi ya kufundisha kwa kuwa miundombinu ya elimu imeboreshwa kwa kiasi kikubwa.

Akipongeza serikali ya awamu ya sita, Alhaji Kilimba amesema kuwa serikali imekuwa ikitekeleza kazi zake kwa uwazi zaidi na kwa kasi kubwa huku akitolea mfano wa ujenzi wa miradi ya vyumba vya madarsa na vituo vya afya ambapo fedha za maendeleo zimekuwa zikija pamoja na maelekezo ya namna ya kuzitumia.

Kwa upande wake Mkuu wa Mkoa Singida Dkt. Binilith Mahenge amesema Mkoa wa Singida ulitengewa jumla ya Tshs. Bilioni 13.4 kwa ajili ya elimu msingi na sekondari kwa fedha zilizotokana na Mpango wa Maendeleo kwa Ustawi wa Taifa na Mapambano dhidi ya UVIKO 19.

Aidha Mkuu wa Mkoa akaendelea kusema kwamba kiasi hicho cha fedha kilitakiwa kujenga jumla ya vyumba vya madarasa 662 ambapo 330 ni vyumba kwa ajili ya shule za sekondari na 332 kwa ajili ya shule za msingi na vituo shikikizi.

Naye mjumbe wa kamati ya siasa ambeye pia ni Mkuu wa wilaya ya Singida Mhandisi Paskasi Muragili amesema katika wilaya yake kulikuwa na miradi mbalimbali ikiwemo ujenzi wa vyumba vya madarasa 42 katika Halmashauri ya Manispaa ya Singida na vyumba vya madarasa 67 katika Halmashauri ya wilaya ya Singida.

Aidha miradi mwingine iliyopokea fedha na kuendelea na utekelezaji ni pamoja na miradi ya afya na barabara ambapo ujenzi wa barabara kwa kiwango cha Changarawe eneo la kindai – unyianga- Mtamaa, ujenzi wa zahanati ya Unyianga na ujenzi wa kituo cha afya Mandewa ( Mwaja) alibainisha Mhandisi Muragili.

Mkuu wa Wilaya ya Singida Mhandisi Paskasi Muragili akifafanua jambo mbele ya Mwenyekiti wa Kamati ya Siasa ya Mkoa Alhaji Juma Kilimba na wajumbe wa kamati hiyo.