KAMATI YA SIASA YA WILAYA YARIDHISHWA NA UBUNIFU KATIKA UTEKELEZAJI WA MIRADI YA MAENDELEO

Posted on: July 10th, 2023

Kamati ya siasa ya wilaya ya Singida Mjini imeeleza kuridhishwa kwake na ubunifu uliotumika katika kutekeleza miradi ya ujenzi wa vyumba vya madarasa kupitia mradi wa BOOST na ile iliyotekelezwa kwa fedha kutoka Serikali Kuu.

Mwenyekiti wa Kamati ya Siasa Wilaya ya Singida Mjini, Bi. Lucia Mwiru, ameeleza kuridhishwa na hali ya utekeleza wa miradi hiyo baada ya kukamilika kwa ziara iliyofanyika jana tarehe 10 Julai, 2023 katika Manispaa ya Singida ambapo miradi mbalimbali ikiwemo ya Afya, Elimu, Utawala, maji, barabara  na Vikundi vywa watu wenye ulemavu iliweza kutembelewa.

Mwiru ametoa pongezi kwa walimu wakuu na wakuu wa shule walioonesha ubunifu  katika miradi hiyo na kuwataka watekelezaji wengine kuiga mfano huo ambao ameuita ni wa KIZALENDO .

Pamoja na Pongezi hizo Mwenyekiti huyo wa  Chama Cha Mapinduzi Wilaya, amemtaka Mkurugenzi wa Manispaa ya Singida, Jeshi Lupembe, kukaa na wataalamu ili kurekebisha kasoro zilizobainika katika miradi michache ikiwemo ya afya na ya elimu ili miradi iweze kukamilika na wananchi kunufaika nayo.

“Mkurugenzi kaa na wataalam wako muondoe kasoro chache tulizozibaini, tunataka miradi ikamilike na wananchi waweze kunufaika nayo”, amesisitiza Mwiru.

Hata hivyo mwenyekiti Mwiru, amemtaka Mkurugenzi kutosita kuchukuwa hatua kwa watumishi ambao wanahatarisha shughuli ya utekelezaji wa miradi kwa usimamizi duni na matumizi mabaya ya fedha za miradi.

Mwiru ameipongeza Serikali ya awamu ya sita kwa kuona umuhimu wa kujenga mabwawa ya maji taka nakusema kuwa ujenzi huo utakapokamilika wananchi watanufaika nao kwa upande wa kilimo cha mbohgamboga na matunda na hivyo kukuza uchumi wao binafsi lakini pia kupendezesha mandhari ya Manispaa ya Singida .

Naye Mstahiki Meya wa Manispaa ya Singida,Yagi Kiaratu, akizungumzia ziara hiyo amesema ni utaratibu wa kawaida ambao unaboresha utendaji kazi wa watumishi katika halmashauri ikiwa ni utekelezaji wa ilani ya Chama Cha Mapinduzi.

Aidha Mheshimiwa kiaratu ametumia fursa hiyo kama mjumbe wa Kamati ya Siasa ya Wilaya, kuwapongeza wasimamizi wa miradi katika shule ya Msingi Kititimo, Minga na Mkuu wa Shule Mungumaji kwa kusimamia vizuri miradi na kuwa wabunifu hali iliyofanya thamani halisi ya fedha kuonekana katika utekelezaji wa Mradi hiyo.

Kwa upande wake Mbunge wa Jimbo la Singida Mjini, Musa Sima, amepongeza walimu kwa usimamizi mzuri wa miradi ya BOOST na ile ya Serikali Kuu na kuwaasa watekelezaji wengine wa miradi inayoendelea na itakayokuja kuiga mfano mzuri wa walimu katika kusimamia miradi.

Aidha ameipongeza Serikali kwa kusikia kilio cha wananchi katika sekta za elimu, Afya, Maji na barabara kwa kupeleka fedha kwa ajili ya utekelezaji wa miradi  hiyo katika Jimbo la Singida mjini na hivyo kupunguza changamoto zilizokuwa zinawakabili wananchi.