KATIBU TAWALA MKOA WA SINGIDA AHIMIZA VIWANGO VYA UBORA KATIKA MIRADI INAYOTEKELEZWA

Posted on: February 14th, 2024

Katibu Tawala Mkoa wa Singida, Dkt. Fatma Mganga ametoa maelekezo katika miradi ya elimu inayoendelea kutekelezwa akisisitiza kukamilika kwa wakati na kwa ubora wa juu huku akitoa onyo kwa wale wote ambao hawatakidhi viwango vya ubora.

Mganga amesema hayo Leo Februari 14,2024 katika ziara yake maalum ya kutembelea miradi mbalimbali ya maendeleo katika Halmashuri ya Manispaa ya Singida.

Ziara hiyo ililenga zaidi miradi ya elimu inayoendelea kutekelezwa ndani ya Manispaa.

Katika ziara hiyo, Dkt. Mganga alifanikiwa kupita katika Shule za Msingi Ipembe, Kibaoni, Nyunjwi, Sabasaba, Mughanga kuangalia maendeleo ya ujenzi wa madarasa pamoja na vyoo, ambapo pia aliweza kupata taarifa juu ya ufaulu kwa darasa la nne na la saba na kujionea hali halisi ya lishe mashuleni.

Pamoja na miradi ya elimu, Dkt. Mganga alifanikiwa pia kuangalia maendeleo ya ujenzi wa Jengo la Utawala la Manispaa ambalo linaendelea na ujenzi pamoja na Hospitali ya Manispaa ambayo shughuli za ukarabati zinatarajiwa kuanza katika baadhi ya majengo na pia ujenzi wa majengo mawili ya dharura na Jengo la Wazazi .

"Ninatoa maelekezo miradi yote lazima iwe na ratiba ilikuona mambo yanaenda sawa na kukamilika kwa wakati.

Aidha kiongozi huyo alisisitiza kuhusiana na masuala ya lishe shuleni kwa kusema utoaji wa Chakula shuleni ni jambo la msingi na ni kichocheo cha wanafunzi kufaulu hivyo kuzitaka shule kujipanga katika Jambo hilo.