KONGOLE MANISPAA YA SINGIDA KWA KUFIKIA ASILIMIA 91 YA MAKUSANYO MAPATO YA NDANI

Posted on: May 9th, 2024

Wajumbe wa Baraza la Madiwani Manispaa ya Singida wamepongeza juhudi kubwa iliyofanywa na Mkurugenzi wa Manispaa pamoja na wataalam ya kusimamia vyanzo vya mapato na kukusanya mapato ya ndani kwa asilimia 91.

Pongezi hizo zimetolewa na Mstahiki Meya wa Manispaa ya Singida, Yagi Kiaratu pamoja na wajumbe wa baraza la madiwani leo Mei 09,2024  katika siku ya pili ya mkutano wa baraza hilo katika robo ya tatu, ulifanyika katika Ukumbi wa Chuo cha Ufundi VETA, Manispaa ya SIngida.

 Meya ambaye ni Mwenyekiti wa Baraza hilo amesema, mafanikio hayo ni matunda ya ushirikiano baina ya wataalamu na madiwani na kutoa rai kuendelea kushirikiana ili kuiwezesha halmashauri ya Manispaa kuvuka lengo ndani ya miezi miwili iliyobaki kabla ya mwaka kuisha.

Amesema pamoja na mafanikio hayo bado kuna baadhi ya vyanzo havifanyi vizuri na kuwataka wakuu wa Idara na vitengo ambao ni wasimamizi wa vyanzo vya mapato kuhakikisha kila mmoja anasimamia vyema chanzo chake ili kuweza kukusanya kadri ya malengo yaliyowekwa. 

“ wekeni utaratibu wa kujipima kwa siku, wiki na mwezi ili mbaini eneo lenye changamoto katika ukusanyaji mapato na kulitafutia ufumbuzi mapema”, amesema Kiaratu

Mstahiki Meya amezikumbusha idara zenye miradi inayoendelea kutekelezwa kuhakikisha zinaomba fedha za utekelezaji kulingana na mpango kazi wa utekelezaji mapema ili kuepuka changamoto ya mfumo kuzima ili kupisha ufungaji wa hesabu za mwaka jambo ambalo litasababisha kusimama kwa miradi.

Aidha amesisitiza juu ya ushirikishaji madiwani katika hatua zote za utekelezaji wa miradi kuanzia mapokezi ya fedha ,ujenzi na hata kukamilika kwa mradi na kukabidhi.

Naye wa Mwenyekiti wa CCM Wilaya ya Singida Mjini, Bi Lucia Mwiru ameungana na wajumbe wa Baraza kupongeza bidii kubwa ya makusanyo ya mapato ya ndani ya Halmashauri iliyofanikisha kufikia asilimia 91 ya lengo la mwaka.

Aidha akizungumzia suala la miradi Mwenyekiti Mwiru,amewataka wataalam na hasa watendaji kuwashirikisha madiwani wa kata zao ambao ndiyo wenyeviti wa kamati za maendeleo za kata katika utekelezaji wa miradi kwa asilimia 100 ili kuleta tija katika miradi hiyo.