KULANGA: MTUMIENI VYEMA MKURUGENZI JESHI LUPEMBE

Posted on: October 2nd, 2023

Wakuu wa Idara na Vitengo wameaswa kumtumia vyema Mkurugenzi wa Manispaa ya Singida Jeshi Godfrey Lupembe ili waweze kufikia malengo yao ya kiutendaji kwa wepesi.

Kulanga Matia Kanyanga, aliyekuwa Mkuu wa Idara ya Rasilimali watu na Utawala Manispaa ya Singida, ametoa nasaha hizo katika kikao cha maenejimenti ambapo alitumia fursa hiyo kuagana na wakuu wa Idara na Vitengo baada ya kupata Uhamisho kwenda Halmashauri ya Manispaa ya Sumbawanga.

Akitoa neno la shukrani   kwa Mkurugenzi wa wakuu wa Idara na Vitengo Kulanga amesema, Mkurugenzi  Jeshi Lupembe, ni mtu wa kipekee ambaye anaongoza kwa uwazi bila kuonea mtu aibu hivyo kuwataka wakuu hao kuhakikisha wanamtumia vyema kwa kupata ushauri na kusimamia vyema maelekezo yanayotolewa.

Aidha amewataka viongozi hao, kumpa ushirikiano Mkurugenzi lakini pia kuendelea kufanya kazi kama timu, ili kufikia malengo makubwa ya Manispaa.

Akitoa neno la shukrani kwa niaba ya wakuu wa Idara na Vitengo, Dr. Adrianus Kalekezi, Mkuu wa Idara ya Kilimo na Mifugo, amesema Kulanga atakumbukwa kwa kazi nzuri ya kuwaunganisha watumishi , kupandisha madaraja pia kuboresha hali za watumishi.

Alimtaka Kulanga kupeleka mazuri ya Manispaa ya Singida huko aendako ili kuendelea kuitangaza Manispaa Singida.

Kulanga pia alipata fursa ya kuangana na wajumbe wa Kamati ya Fedha na Utawala ambapo aliwapongeza wajumbe wa kamati hiyo kwa umakini katika kuhakikisha Manispaa inatekeleza vyema majukumu yake.

“..nitoe rai kwa waheshimiwa madiwani pamoja na wakuu wa idara na vitengo kuendelea kushirikiana kwa maendeleo ya Manispaa ya Singida”, amesema Kulanga

Mstahiki Meya wa Manispaa Yagi Maulid Kiaratu, amesema Kulanga ni miongoni mwa Wakuu wa Idara waliokuwa wanajituma, na kwamba alikuja Manispaa ya Singida na kukuta hali ya watumishi ikiwa katika kiwango cha chini na hivyo kufanya mabadiliko makubwa yaliyorudisha ari ya utendaji kazi kwa watumishi.

Akitoa neno la shukrani kwa niaba ya  madiwani wote,  Mhe. Margareth Malechela, alimtaka Kulanga, kuendeleza mazuri aliyokuwa akiyafanya kwenye Manispaa Singida katika kituo chake kipya cha kazi.

Alimpongeza kwa kufanya kazi bila kuchoka hata kuiwezesha Manispaa ya Singida kupata tuzo katika maadhimisho ya siku ya wafanyakazi Duniani kutokana na kujali watumishi wake kwa kuboresha mazingira ya kazi, kusikiliza kero za watumishi na kupandisha madaraja watumishi  kwa wakati.