MAADHIMISHO YA MIAKA 58 YA MUUNGANO: RC SINGIDA APIGA MARUFUKU VIFUNGASHIO VYA VITUNGUU VISIVYOTHIBITISHWA NA SERIKALI

Posted on: April 26th, 2022

Kaimu Mkuu wa Mkoa wa Singida Mhandisi Paskasi Mulagiri leo tarehe 26.04.2022, amepiga marufuku Wafanyabiashara wa Vitunguu katika Mkoa wa Singida kutumia vifungashio ambavyo havijathibitishwa na Serikali.

Mhandisi Muragili ambaye pia ni Mkuu wa Wilaya ya Singida ametoa katazo hili katika maadhimisho ya miaka 58 ya Muungano wa Tanganyika na Zanzibar ambayo yameadhimishwa ki- mkoa katika Manispaa ya Singida eneo la soko la Vitunguu.

Amesema wapo Wafanyabiashara ambao sio waaminifu na kwamba wanakiuka makubaliano waliyofikia mwaka 2019 baina yake na Wafanyabiashara wa vitunguu ambapo ilikubalika kutumika mifuko ambayo ni ya nyavu (net) za plastiki yenye uwezo wa kubeba kilo kati ya 90 hadi 100 na iliyothibitishwa na serikali.

“Nakumbuka mwaka 2019 tulikutana na Wafanyabiashara tukakubaliana kuachana na rumbesa na badala yake tutumie vifungashio aina ya net zenye uwezo wa kubeba kati ya kilo 90 hadi 100, ninarudia tena ni marufuku kutumika vifungashio ambavyo havijathibitishwa na Serikali” amesisitiza.

Mkuu wa Wilaya Mulagiri, ameagiza Wafanyabiashara wataokiuka agizo hilo wakamatwe na kuchukuliwa hatua kwani sheria iko wazi kuhusina na hilo, Aidha alisema ufungashaji wa rumbesa  huwakosesha haki wakulima.

Mhandisi Mulagiri pamoja na masuala mengine amewapongeza wananchi wa Manispaa ya singida na Wilaya nzima ya Singida kwa ushiriki mzuri katika zoezi la usajili waanwani za makazi na kuwataka kujiandaa na kutoa ushirikiano kwa ajili ya zoezi la sensa ya watu na makazi linalotarajiwa kufanyika mwezi Agosti, 2022 na kusisitiza kuwa zoezi hilo ni muhimu sana kwa ajili ya mipango ya Maendeleo ya nchi.

Aidha amewataka wananchi kuwapeleka Watoto wao wenye umri chini ya miaka 5 kupata chanjo ya polio kutokana na tishio la ugonjwa huo kutoka nchi ya Jirani ambapo tayari mgonjwa wa polio amepatikana.

“itakumbukwa Tanzania tulipata mgonjwa wa mwisho mwaka 1996. Tumeendelea kuchanja Watoto kila wanapopelekwa kliniki, chanjo hii haitolewi kwa sindano ila kwa matone. Hivyo tusisite kupeleka Watoto kwani madhara ya polio ni makubwa”, alisema.