MAADUI 3 WA MAENDELEO WAMESHUGHULIKIWA IPASAVYO MKOANI SINGIDA – RC SERUKAMBA

Posted on: December 13th, 2023

Mkuu wa Mkoa wa Singida Peter Serukamba amemhakikishia Mhe. Mohamed Mchengerwa, Waziri wa Nchi Ofisi ya Rais TAMISEMI kuwa katika mkoa wake umefanikiwa kuwashughulikia maadui watatu wa maendeleo ambao ni maradhi, ujinga na umaskini  na wanaendelea kushughulikiwa kupitia miradi ya elimu na afya inayoendelea kutekelezwa mkoani humo.

Akisoma taarifa ya utekelezaji wa shughuli za maendeleo za mkoa wa Singida, kwa Waziri wa Nchi OR- TAMISEMI, Mhe. Mohamed Mchengerwa, mkuu wa mkoa Serukamba amesema katika kipindi cha miaka miwili ya serikali ya awamu ya sita, bajeti ya mkoa wa Singida imeongezeka na kufikia 327%, vituo vya afya vimeongezeka kutoka 8 na kufikia 17, jumla ya vijiji 331 vimepata umeme na usambazaji wa wa mtandao wa maji safi na salama umefikia 70% katika mkoa wake.

“Nataka nimhakikishie Rais kupitia kwako Mhe. Waziri kwamba kwa Mkoa wa Singida maadui watatu wa maendeleo wameshughulikiwa ipasavyo na serikali hii ya awamu ya sita inayoongozwa na Rais Dkt. Samia Suluhu Hassan” amesema Serukamba.

Serukamba amesema katika kipindi cha miaka miwili ya Mhe. Rais wa Jamhuri ya Muungano wa Tanzania, Dkt. Samia Suluhu Hassan, Mkoa wa Singida umenufaika katika sekta ya afya kwa kujenga Hospitali 2, majengo 4 ya dharura, majengo 3 ya wagonjwa mahututi, vituo vya afya 17 zahanati 43 watumishi wapya 619 na ununuzi wa dawa na vifaa tiba vilivyogharimu zaidi ya Tshs Bilioni 7.5.

Mkuu wa Mkoa amemweleza waziri huyo kuwa Mkoa wa Singida umepokea magari 06 kati ya mgari 15 ambayo mkoa huo utakabidhiwa , na kwamba magari hayo yatasaidia kurahisisha kasi ya utoaji huduma kwa wanananchi, ubebaji wa wagonjwa hasa kina mama wajawazito na Watoto, shughuli za usimamizi shirikishi katika vituo vya afya na zahanati

Serukamba ameahidi kuyasimamia na kuhakikisha yanafanya shughuli lengwa ili kuchochea kasi ya utoaji huduma kwa wananchi hasa vijijini na maeneo ya pembezoni

Magari 06 aina ya Toyota Landcruiser yamekabidhiwa kwa halmashauri tano na moja kwa mganga mkuu wa mkoa. Halmashauri zilizopata magari hayo ni Iramba, Ikungi, Singida DC, Manyoni na Mkalama. Halmashauri 02 zilizobaki ambazo nisingida Manispaa na Itigi zitakabidhiwa magari yao ifikapo Desemba 30,2023.