MAAFISA UGANI WATAKIWA KULETA MAPINDUZI YA KILIMO KATIKA MSIMU UJAO WA KILIMO 2022/2023

Posted on: June 13th, 2022

Maafisa Ugani mkoa wa Singida wametakiwa kuleta mapinduzi ya kilimo katika msimu ujao wa kilimo ili kukidhi mahitaji hususani ya chakula sambamba na ya viwanda.

Agizo hilo limetolewa leo (13/06/2022) na Mkuu wa Mkoa wa Singida,Dk.Binilith Mahenge wakati hafla ya kukabidhi pikipiki 166 kwa maafisa ugani na maafisa ushirika wa mkoa wa singida.

Alisema huko nyuma maafisa ugani walikabiliwa na changamoto sugu ya ukosefu wa usafiri hivyo kushindwa kuwafikia wakulima kwa wakati na kuwataka kutumika nyenzo hiyo kuwafikia wakulima, wafugaji na wana ushirika kwa muda muafaka na kutatua changamoto zinazohitaji utaalamu zinazowakabili.

Dr. Mahenge  amesema haitarajiwi wala haitavumiliwa kwa afisa yeyote wa ugani kutumia pikipiki aliyokabidhiwa tofauti na lengo kwa kuibadilisha matumizi na kuwa boda boda na atakayebainika,atachukuliwa hatua stahiki.

“Sasa tatizo la usafiri,limebaki kuwa historia.Pikipiki hizi zitumike kwa kufanyia kazi za Serikali za kuwafikia wakulima,wafugaji na wanaushirika.Hawa hakikisheni mnawapatia elimu ya kilimo bora,ufugaji wa kisasa na ushirika wenye tija.Tatueni chanagamoto zinazohitaji utaalamu wa ugani”,amesisitiza.

Aidha Mkuu wa Mkoa wa Singida amezitaka Halmashauri zote katika mkoa huo zihakikishe maafisa ugani wote wanapatiwa mafunzo ya udereva wa pikipiki ili kuepusha ajali zitokanazo na kukosa elimu ya udereva na kwamba mafunzo hayo yafanyike kabla ya mwezi huu kuisha. Amewataka waafisa hao wahakikishe wanazitumia pikipiki hizo kwa uagalifu mkubwa, ili ziweze kudumu kwa muda mrefu.

“Wakurugenzi wa halmashauri ninasisitiza kufuatilia matumizi sahihi ya pikipiki na kuchukua hatua stahiki mapema kwa maafisa watakaotumia pikipiki kinyume na maelekezo haya”, amesema.

Pia amewataka maafisa ugani kuandaa mpango kazi wa kila siku, anapotumia pikipiki ifahamike wazi amekwenda wapi,amehudumia wateja wangapi ambao ni wakulima, wafugaji, AMCOS na SACCOS.

“Pikipiki zilete madadiliko chanya katika kilimo,mifugo na ushirika” na akatoa rai kwa  Maafisa ugani kuwafikia na kuwapatia mafunzo wateja wengi zaidi na kwamba tija ya mafunzo hayo ionekane katika kuongezeka kwa matumizi ya kanuni bora na uzalishaji wa mazao ya kilimo na mifugo hasa zao la alizeti ambalo ni zao la kimkakati kimkoa lipewe kipaumbele.

Halmashauri ya Manispaa ya Singida imepokea jumla ya pikipiki 14 zitakazo hudumia kata zote 18 za Manispaa ya Singida.