MAAJABU YA SINGIDA!!!

Posted on: April 22nd, 2024

MSANIFU majengo kutoka Benki ya Dunia, Dr Antoni Scholtens Folkers ameeleza kushangazwa kwake na soko maalumu la vitunguu lililopo katika Manispaa ya Singida.Dr. Folks ameonesha mshangao h uo mwishoni mwa wiki alipotembelea soko la kimataifa la vitunguu lililopo katika Kata ya misuna katika Manispaa ya singida linalotarajiwa kujengwa kupitia mradi wa TACTIC chini ya Benki ya Dunia.

" Haya ni maajabu kabisa, I have never seen such a market..." amesema Dr. Anthoni.

Msanifu majengo huyo, kutoka Benki ya Dunia, amekiri kushangazwa  na soko hilo na kusema itamlazimu kutulia Ili kuandaa mchoro wa jengo ambao utakuwa wa mfano Afrika na pegine hata ulaya.

Aidha ameonekana kufurahia shughuli zilizokuwa zikiendelea katika soko hilo hususani za upakuaji, uchambuzi wa vitunguu kwa gredi na upakiaji.

Pamoja na mambo hayo, ameweza pia kuona umuhimu wa soko hilo kwa maisha ya jamii kutokana na ajira zinazozalishwa sokoni hapo.

Akimkaribisha mgeni huyo, Diwani wa Kata ya Misuna, Hamis Kisuke amesema, ujio wa mtaalam kutoka Benki ya Dunia umekuja wakati muafaka ambao ndo msimu wa vitunguu hivyo kuona namna shughuli zinavyotekelezwa lakini pia kupata picha halisi ya mazingira wanayofanyia kazi wafanyabiashara na umuhimu wa uwepo wa soko la kisasa.

Naye Mwenyekiti wa Soko la Vitunguu, Iddi Mwanja, amesema soko hilo lina umuhimu sana kwa nchi jirani za Afrika na kutaja nchi zinazofika kununua vitunguu kuwa ni pamoja na Kenya, Uganda, congo, Burundi, sudani kusini, Comoro, Syschelles ambazo wafanyabiashara wake hufika na kununuaa vitunguu hivyo.

" Soko hili ni la kipekee Afrika Afrika Mashariki na Dunia, tunatarajia ujenzi wake utakuwa wa mfano" amesema Mwanja.

Manispaa ya Singida ni miongoni mwa halmashauri 15 zilipitishwa kutekeleza miradi ya TACTIC Kwa awamu ya pili kwa ufadhili wa Benki ya Dunia. Jumla ya miradi 3 itatekelezwa ukiwamo wa ujenzi wa soko la kisasa la vitunguu - misuna, ujenzi wa mfereji mkubwa wa maji ya mvua - Mnung'una Kata ya Minga na ujenzi wa Barabara zenye urefu wa zaidi ya Km. 7