MADIWANI MANISPAA YA SINGIDA WATAKIWA KUWA KIELELEZO CHA MFUKO WA AFYA YA JAMII - iCHF

Posted on: September 7th, 2022

Wananchi Mkoa wa Singida, wametakiwa  kujiunga na Mfuko wa Bima ya afya iliyoboreshwa (iCHF), ili kuweza kupatiwa huduma bora za matibabu kupitia vituo vya afya na zahanati vilivyojengwa/ kukamilishwa  na serikali.

Mkuu wa Mkoa wa Singida Peter Joseph Serukamba, alitoa agizo hilo wakati akizungumza na madiwani, watendaji wa Kata na wakuu wa idara na vitengo kupitia Mkutano wa Baraza la Madiwani Manispaa ya Singida, uliofanyika kwenye ukumbi wa Maktaba, katika shule ya Sekondari Mwenge.

Aidha Serukamba amesema Madiwani kama viongozi wawakilishi wa wananchi wanapaswa kuonesha mfano kwa  kuziunganisha Kaya zao katika mfuko wa  afya ya jamii (CHF), ili baadaye zinufaike na huduma bora za matibabu pindi  mwanafamilia anapougua, hali itakayookoa gharama kubwa za matibabu.

“Serikali yetu inayoongozwa na Rais mchapa kazi, mama Samia Suluhu Hassan, imefanya kazi kubwa…ametumia fedha nyingi kujenga zahanati kila Kijiji, vituo vya afya kila Kata na hospitali kwa wilaya zote nchini, sasa lazima tumuunge mkono kwa kuhamasisha wananchi kujiunga na Bima ya afya…,” alisisitiza Serukamba.

Kuhusu ushirikiano baina ya watendaji, wataalamu na madiwani katika Manispaa ya Singida, Mkuu wa Mkoa amesema kuwa hategemei kuona ushirikiano huo ukilegalega kutokana na kila upande kushindwa kutekeleza vema majukumu yake. Na kuwataka kila mmoja kutekeleza majukumu yake kulingana na nafasi anayotumika ili kuondoa migongano isiyokuwa ya lazima, lengo likiwa ni kuiletea manispaa ya Singida maendeleo.

Aliwataka wataalamu na watendaji wa Manispaa ya Singida, kutumia weledi katika kuongeza mapato ya ndani kupitia vyanzo mbalimbali kwa kuwa na mkakati madhubiti wa ukusanyaji mapato na uibuaji wa vyanzo vipya vyenye tija.

Serukamaba pia amesisitiza suala la kuuweka mji kwenye hali ya usafi ili uwe nadhifu na kuvutia wageni wanaoingia na kutoka Pamoja afya za wananchi wa Manispaa ya Singida ambao ndiyo kitovu cha Mkoa wa Singida.

“Mheshimiwa Meya, naomba sana muwe na mkakati wa kuongeza mapato, kwa kupitia vyanzo vya mapato, na muwe wabunifu katika kupata vyanzo vipya ambavyo vitainua mapato yenu, kuliko mlivyo sasa asilimia 90,”amefafanua.

Kuhusu suala la hoja za ukaguzi, Serukamba alisema hatarajii kuona hoja za ukaguzi zikiongezeka  na kwamba  suala hilo linapaswa kudhibitiwa mapema na mkaguzi wa ndani ili kuepuka kuzalishwa kwa hoja za Ukaguzi na kumtaka Mkaguzi wa Ndani kuwajibuka ipasavyo katika majukumu yake.

“Kuzalishwa kwa hoja nyingi za ukaguzi tafsiri yake ni uzembe katika kusimamia na kufuata sheria za fedha…” amesema Serukamba

Kwa upande wake Mstahiki Meya wa Manispaa ya Singida Yagi Kiaratu amemshukuru Mkuu huyo wa Mkoa kwa nasaha zake mbele ya mkutano huo wa Baraza la Madiwani, na kumhakikishia kuwa maagizo aliyotoa yatasimamiwa na kutekelezwa kwa maslahi ya wananchi wa Manispaa ya Singida.

Mkuu wa Mkoa wa Singida amefanya  ziara hiyo katika Manispaa ya Singida kwa lengo la kujitambulisha kwa waheshimiwa madiwani pamoja na watumishi kufuatia kuteuliwa kwake na Mhe.Rais Samia Suluhu Hassan, kwa nafasi ya  Mkuu wa Mkoa wa Singida.