MAENDELEO YA SEKTA YA MAWASILIANO, VIWANDA KUBORESHA MAISHA YA WANANCHI SINGIDA

Posted on: October 25th, 2024

Waziri wa Habari, Mawasiliano na Teknolojia ya Habari, Mhe. Jerry William Silaa (Mb.) ametembelea na kukagua mradi wa kiwanda cha Taifa gas na kiwanda cha mafuta ya kupikia cha Wild Flower &Oil Mills Co.Ltd vinavyojengwa Mkoani Singida ikiwa ni utekelezaji wa Sera ya uchumi wa viwanda ya kupunguza umaskini na kukuza pato la Taifa.

Akiendelea na ziara yake Mkoani Singida Oktoba 25, 2024, Waziri huyo amevutiwa na mradi wa kiwanda cha Taifa gas ambao unasaidia kutekeleza Mkakati ulioasisiwa na Rais Samia wa nchi nzima kutumia nishati safi ya kupikia ifikapo mwaka 2034.

Waziri Silaa pia ametembelea na kukagua ujenzi wa kiwanda cha Wild Flower &Oil Mills Co.Ltd kitakachozalisha mafuta ya alizeti ambacho ujenzi wake umefikia asilimia 95 na unatarajiwa kuzalisha ajira 190 za moja kwa moja na 460 zisizo za moja kwa moja, wakulima wa alizeti 26,000 watanufaika na mradi huu.

Sambamba na miradi ya sekta ya viwanda, Waziri huyo pia

amezindua mnara wa mawasiliano ya simu wa Airtel katika kijiji cha Mikuyu, ambao umejengwa kwa ruzuku ya Serikali ya shilingi milioni 115 kutoka Mfuko wa Mawasiliano kwa Wote (UCSAF) ikiwa pia ni jitihada zinazofanywa na Serikali za kuwaunganisha watanzania wote na huduma za kidijiti.

Kabla ya kuhitimisha ziara yake kwa kuzungumza na wananchi wa kijiji cha Makuro na kuwasisitizia kuhusu umuhimu wa miradi ya maendeleo katika kuboresha hali ya maisha katika jamii, Waziri Silaa alikagua pia

mradi wa majitaka utakaosaidia kuboresha usafi wa mazingira lakini pia kutumika kusaidia shughuli za kilimo.