MANISPAA YA SINGIDA YATOA MAFUNZO KWA WADAU MBALIMBALI JUU YA ZOEZI LA ANWANI ZA MAKAZI NA POSTIKODI

Posted on: March 3rd, 2022

Mkuu wa wilaya ya Singida Mhandisi Paskasi Mulagiri amesema zoezi la uandaaji anwani za makazi na postikodi ni zoezi linalohitaji ushikishwaji wa hali ya juu katika ngazi zote hususan ngazi inayohusu mwananchi moja kwa moja ilifufanikisha kazi hiyo na kuwataka washiriki kuwa makini ili kuepuka dosari zinazoweza kupelekea kuharibu utekelezaji wa zoezi hilo

Amesema kwa uhabarisho waliopatiwa wadau leo ni heshima ya kipekee kwani wao wamekuwa washiriki wa moja kwa moja katika nafasi zao katika kutekeleza zoezi la uwekaji wa anwani za makazi na kwamba uwepo wa Viongozi mbalimbali, wenyeviti wa mitaa watendaji ni wazi kuwa zoezi la uwekaji anwani za makazi linakwenda kufanikiwa .

Alisema zoezi hili ili liweze kufanikshiwa vizuri na kuweza kuonekana katika kiwango kinachotakiwa kunagharama kubwa zitakazotumika na ni zoezi ambalo haliepukiki. Ameendelea kufafanua kuwa zipo gharama zitakazobebwa na Serikali kuu, Manispaa na wananchi wenyewe nakuwataka wadau wasiogope kwani ni jukumu letu sote na linamanufaa makubwa kwa Jamii

“ msiogope ukubwa wa gharama hizi kwani gharama hizi zikishushwa katika ngazi ya mwananchi gharama hizo sio kubwa” alisisitiza Mkuu wa wilaya na kuwataka wananchi kuchangia kwa kununua kibao kidogo cha namba kwa ajili ya kupachika katika nyumba zao.

Aidha Mhandisi Mulagiri aliendelea kuwaomba wenyeviti wa mitaa Pamoja na wananchi katika mitaa yao kubebba gharama za kusimika nguzo na vibao katika mitaa yao badala ya kuiachia Serikali pekee nakuongeza kuwa serekali itabeba gharama za vibao vinavyoonesha barabara.

“kama Serikali hatuwezi peke yetu kuweka vibao katika mitaa yote, ndio maana nawaomba tusaidiane hizi gharama, Serikali itabeba sehemu yake, Manispaa vilevile Mtaa na mwananchi mmoja mmoja”alisihi Mkuu wa wilaya.

Mkuu wa wilaya aliwasisitiza wenyeviti  wa mitaa kuhakikisha elimu / uhabarisho walioupata wanaufikisha vyema kwa wananchi ili kufanya zoezi hili kuwa rahisi na kuwataka kuhakikisha wanafanya kazi ya kugawa madodoso kwa umakini na uaminifu mkubwa bila kumwacha mkaazi katika mtaa wake.

“inawapasa kufanya kazi hii kwa uaminifu na umakini mkubwa, msifanye kosa la kumwacha mtu bila kumpatia dodoso haijalishi mida anayorudi nyumbani hakikisheni anapatiwa dodoso na anajaza taarifa zake” alisisitiza

Mstahiki Meya wa Manispaa ya Singida Mhe. Yagi Kiaratu ambaye alimwakilisha Mkuu wa Wilaya katika ufunguzi wa mafunzo/ uhabarisho alisema Manispaa imetambua umuhimu wa wadau mbalimbali kushirikishwa katika zoezi la uwekaji anuani za makazi na postikadi ili kuifanya kazi hii kuwa shirikishi na hivyo kuleta wepesi katika utekelezaji.

Alisema Mpango huu una manufaa mengi  ikiwa ni pamoja na kuongeza ufanisi  katika utawala bora kwa kutambua makazi ya raia wote nchini, kuimarisha usalama, kuboresha utoaji huduma za Jamii na kuongeza pato la taifa kwa kuboresha ukusanyaji wa kodi mbalimbali

Naye Mwenyekiti wa CCM wilaya ya Singida Mjini Bi. Lucia Mwiru alimpongeza mstahiki meya pamoja na Ofisi ya Mkurugenzi kupitia kamati ya kuratibu zoezi la uwekaji anwani za makazi kwa kuandaa mafunzo/ uhabarisho kwa wadau na kusema kuwa kwa sura hii Halmashauri ya Manispaa ya Singida itafanikiwa kwa asilimia kubwa katika utekelezaji wa zoezi hili.

“ hii ni halmashauri ya  kwanza kufanya uhabarisho kwa Viongozi mbalimbali,  wenyeviti wa mitaa, watendaji  wa kata na Mitaa Pamoja na wadau mbalimbali  hii inamaana kwa kuwa tumeanza mapema basi na zoezi letu litakwenda vizuri sana” alipongeza  Bi. Mwiru

Jumla ya wadau 275 wakiwemo waheshimiwa madiwani, Viongozi wa dini, wazee maarufu, wajumbe wa Kamati ya ulinzi na usalama wilaya, wenyeviti wa mitaa na  Vijiji, Wakuu wa idara na Vitengo, wawakilishi wa taasisi mbalimbali, watendaji wa kata, mitaa na Vijiji, walimu Wakuu, Wakuu wa shule na Maafisa elimu Kata walishiriki mafunzo hayo.