MAFUNZO KWA VIJANA YA KILIMO CHA KISASA CHA MBOGAMBOGA NA MATUNDA

Posted on: March 7th, 2022

Serikali imetoa zaidi ya Tshs. 30,000,000 kwa ajili ya kuwezesha ujenzi wa kitalu nyumba pamoja na mafunzo kwa Vijana ya kilimo cha mbogamboga na matunda kwa kutumia teknolojia ya kisasa ya uzalishaji kwa kutumika kitalu nyumba (green house) katika Manispaa ya Singida.

Mratibu wa mafunzo kutoka Halmashauri ya Manispaa ya Singida Simon Magige amesema kuwa jumla ya Vijana 100 kutoka katika kata 18 za Halmashauri ya Manispaa ya Singida wamenufaika kwa kupatiwa mafunzo ya uzalishaji wa mazao ya mbogamboga na matunda kwa kuwezeshwa na Ofisi ya Waziri Mkuu.

Mafunzo hayo kwa mujibu wa mratibu yametolewa na wataalumu kutoka Chuo cha Kilimo Sokoine (SUGECO) wakishirikiana na wataalamu wa kilimo kutoka Manispaa ya Singida.

Mratibu huyo amesema vijana hao pamoja na mafunzo ya kinadharia pia wanafanya mafunzo kwa vitendo kwa muda wa siku 16. Aidha amebainisha kuwa tayari kundi la kwanza lenye wanafunzi 50 lililoanza mafunzo Februari 28, 2022 limeshapatiwa elimu na kwa sasa kundi la pili lenye wanafunzi 50 ambalo limenza mafunzo 7 March, 2022 linaendelea na mafunzo na kwamba wote kwa Pamoja wanatarajiwa kuhitimu 14 March 2022 na kupatiwa vyeti vya kuhitimu.

Amesema pamoja na mafunzo ya darasani na yale ya vitendo nje ya darasa, wanafunzi hao 100 watapata fursa pia ya kujifunza masuala ya ujasiriamali na kujiunga katika vikundi ili kuweza kutambuliwa rasmi na kufikiwa panapotokea fursa mbalimbali ikiwemo mikopo ya vijana inayotokana na asilimia 10 za mapato ya ndani ya Halmashauri ya Manispaa.

“Baada ya mafunzo ya nadharia na vitendo kuhusu kilimo cha mbogamboga na matunda Vijana hawa watapata nafasi pia ya kujiunga kwenye vikundi vinavyotambulika rasmi na kuelimishwa juu ya fursa mbalimbali zilizopo”. Alisema Magige.

Magige alisema lengo la kutoa elimu hii kwa Vijana 100 wa kike na wa kiume ni ili waweze kujiajiri na pia kufikisha elimu waliyoipata kwa Vijana wenzao katika maeneo mbalimbali wanayotoka ambao hawakupata fursa ya kujiunga na mafunzo hayo.

Gharama ya zaidi ya Tshs. 30,000,000 zimetumika katika mafunzo pamoja ujenzi wa kitalu nyumba (green house) kilichojengwa kwa ajili ya mafunzo endelevu kwa vitendo (shamba darasa) kwa wakulima wa mbogamboga na matunda katika Halmashauri ya Manispaa ya Singida