MAFUNZO YAKAWEZESHE UMAKINI KATIKA UTOAJI NA USIMAMIZI WA MIKOPO

Posted on: October 8th, 2024

Maafisa Maendeleo ya Jamii ngazi ya Kata katika Halmashauri ya Manispaa ya Singida, wametakiwa kutumia mafunzo waliyoyapata kusimamia vyema zoezi la uundaji vikundi, utoaji mikopo na usimamizi wa mikopo hiyo ili iweze kuwa na tija kwa walengwa.

Akihitimisha mafunzo ya siku tano kwa maafisa hao leo 8 Oktoba, 2024, Mgeni rasmi, Athuman Hemedi Mnyusi, ambaye pia ni mkuu wa Divisheni ya Elimu Sekondari amewaasa maafisa maendeleo ya jamii hao, kutumia fursa ya mafunzo hayo kuhakikisha wanaunda vikundi vizuri ili viweze kuendesha shughuli zao kwa tija.

Amesema mada kuhusiana na kanuni, miongozo na mfumo mpya wa kidigitali wa usajili wa vikundi zilizowasilishwa ni kielelezo tosha cha kuondokana na changamoto mbalimbali za mikopo na marejesho katika vikundi zilizokuwa zikiikabili Halmashauri.

“….mnaporudi kwenye maeneo yenu ufanyikaji wa zoezi hili la uundaji wa vikundi, utoaji mikopo na usimamizi likafanyike vizuri…….” Amesisitiza Mnyusi.

Amesema anaamini siku tano za mafunzo zitaleta tija kwa kuwa maafisa hao wameweza kubadilishana uzoefu na kusahihisha mapungufu yaliyokuwa yakiwakabili na hivyo kuanza upya kulingana na miongozo na kanuni mpya za utoaji na usimamizi wa mikopo ya asilimia 10 zitokanazo na mapato ya ndani ya Halmashauri.

Mnyusi amesema Halmashauri haitegemei kuwepo kwa vikundi hewa kwa kuwa sasa vikundi vinakwenda kusajiliwa kidigitali na kuwataka maafisa hao kuwajengea uelewa viongozi ngazi ya kata ili kwa pamoja washiriki kuihamasisha jamii kuunda vikundi vyenye tija.

Hata hivyo amesema matarajio yake kuona Manispaa ya Singida inakuwa mfano wa kuigwa na halmashauri nyingine kwa kutekeleza vyema zoezi hilo la uhamasishaji uundaji wa vikundi na kuvisajili, utoaji mikopo yenye tija na usimamizi mzuri wa mikopo hiyo.