MAJOSHO 02 MAPYA YAZINDULIWA KATA ZA MTAMAA NA MTIPA

Posted on: November 18th, 2022

Halmashauri ya Manispaa ya Singida imezindua majosho mawili mapya yaliyojegwa kwa gharama ya Sh. Milioni 36,000,000 kupitia Wizara ya Mifugo na Uvuvi.

Kaimu Mkuu wa Idara ya kilimo, mifugo na uvuvi, Hagai Zakaria amesema kila josho limegharimu sh. 18,000,000 na yote yana ujazo wa lita 12,000. Aidha amesema zoezi la uogeshaji mifugo linaendelea vizuri.

Hagai amesema katika Kijiji cha Mtisi Kata ya Mtamaa Ng’ombe zaidi ya 1,200 na mbuzi zaidi 700 wameweza kuogeshwa wakati katika Kijiji cha Manga Kata ya Mtipa Ng’ombe zaidi ya 800 na kondoo 88 wameogeshwa.

 Akifafanua juu ya gharama za uogeshaji mifugo Hagai amesema, gharama kwa ng’ombe mmoja ni Sh. 100/- wakati mbuzi na kondoo ni Sh. 50/- na kwamba fedha zinazokusanywa hutumika kununua dawa za kuogeshea mifugo.

“mwitikio ni mkubwa na zoezi linaendelea vizuri, gharama za uogeshaji kwa ng’ombe nis h. 100/-, mbuzi/kondoo 50/- kwa mwogesho mmoja, fedha tunazokusanya tunanunua madawa kwa kuwa zoezi ni endelevu” amesema Hagai.

Kaimu Mkuu wa Idara huyo,  ameendelea kusema kuwa Serikali imekuwa ikitoa dawa za ruzuku kwa majosho yote yanayofanyakazi  na kwamba Manispaa ya Singida ilishapokea dawa za ruzuku lita 72 aina ya ‘Paranex’

Manispaa ya Singida katika kuhakikisha mifugo inakuwa katika afya njema imetenga kiasi cha Sh. 10,000,000/- katika bajeti yake ya 2022/2023 kupitia mapato ya ndani kwa ajili ya ukarabati wa majosho 02 ya Mtipa na Unyambwa.

Wakati huo huo Idara ya Kilimo, Mifugo na Uvuvi imetoa mafunzo kwa wavuvi 83 kuhusu uvuvi endelevu, usalama mwaloni na kuorodhesha wavuvi ili kujiunga na chama cha jamii ya wavuvi (BMU).

Kaimu Mkuu wa Idara ya Kilimo, Mifugo na Uvuvi  Hagai Zakaria amesema mafunzo hayo yamelenga kuwajengea uwezo wavuvi juu ya matumizi ya zana bora za uvuvi zinazokubalika kisheria, madhara ya uvuvi haramu ikiwemo matumizi ya makokoro, usalama wa wavuvi wawapo katika shughuli za uvuvi, ulinzi shirikishi ili kudhibiti uhalifu na umuhimu wa kujisajili ili kupatiwa leseni za mitumbwi.

Mafunzo hayo yalifanyika kwa ushirikiano baina ya wataalamu wa idara ya kilimo, mifugo na uvuvi, polisi wilaya, ofisi ya Mwenyekiti wa serikali ya Mtaa wa Bomani pamoja na Ofisi ya Mtendaji wa Kata ya Mughanga.