MANISPAA SINGIDA YAANDIKISHA ZAIDI YA ASILIMIA 78 ELIMU YA MSINGI 2025

Posted on: January 13th, 2025

Jumla ya wanafunzi 4,237 wameandikishwa kuanza elimu ya awali, kati ya 7,034 waliokusudiwa, katika shule mbalimbali za Manispaa ya Singida, na wengine 5,251 wakiandikishwa darasa la kwanza, kwa muhula wa masomo ulioanza leo Jumatatu, tarehe 13Januari, 2025, kati ya watoto 6,670 waliotarajiwa mwaka huu.

Kaimu Afisa Elimu awali  na msingi Manispaa ya Singida, Mwalimu Beno Magesa amesema kuwa, hadi kufikia siku ya kwanza ( leo Jumatatu), uandikishaji wanafunzi wa awali ni sawa na asilimia 52.24, wakiwemo wasichana 2,325, kati ya 3,592 ya waliokusudiwa na wavulana 2112 waliandikishwa sawa na asilimia 62.36 kati ya 3442 waliotarajiwa.

“Wanafunzi wa awali,mpaka shule zinafunguliwa kuanza muhula wa masomo, Manispaa imeandikisha wanafunzi 4,237 kati ya maoteo ya 7,034, wakiwemo wasichana 2,325 na wavulana 2,112…naamini idadi hii itaongezeka, kwa wazazi kuandikisha watoto wao, wakati masomo yakiwa yanaendelea darasani,”alisema Magesa.

Kuhusu uandikishaji wanafunzi wa darasa la kwanza, Mwalimu Magesa alifafanua kuwa, hadi kufikia siku ya kwanza ya muhula wa masomo, tayari wanafunzi 5,251 sawa na asilimia 78.73 wameandikishwa, kati ya 6,670, ya waliokusudiwa.

Alisema kuwa, kwenye idadi hiyo wapo wasichana 2,545 ambao ni sawa na asilimia 75.45, na wavulana 2,706, sawa na asilimia 82.7 ya waliokusudiwa.

Kaimu afisa elimu huyo, alitumia fursa hiyo kuwaomba wazazi na walezi wenye watoto ambao bado hawajaandikishwa, wahakikishe wanawapeleka katika shule zilizopo jirani na maeneo yao, ili wanafunzi waweze kutumia haki yao ya msingi ya kupata elimu inayotolewa bure na serikali yao.

Naye Mwalimu Mkuu wa shule ya msingi Dk. Samia Suluhu Hassan, Bi. Jasmini Nkinga, alisema hadi kufikia leo Januari 13, 2025 wakati shule zinafunguliwa, amekwishapokea wanafunzi 135 wa awali na wengine 132 wa darasa la kwanza, huku lengo likiwa kila darasa kuwa na wanafunzi 200.

Hata hivyo Mwalimu Nkinga amefafanua kuwa, pamoja na kujiwekea lengo la kila darasa kuwa na waafunzi 200, lakini wakijitokeza zaidi, uongozi hautakuwa na pingamizi lolote, zaidi ya kuwapokea tayari kwa ajili ya kuwapatia haki yao ya msingi, ambayo ni elimu.

Kadhalika Mwalimu Nkinga amewaomba wazazi na walezi kutumia vema fursa hiyo muhimu, na wahakikishe wanajitahidi kuwapatia mahitaji muhimu ya sare, ili kuwatoa hofu na uonyonge watoto wao, hasa pale wanapochanganyika na wenzao wenye sare zinazopendeza na kuvutia.