MANISPAA YA SINGIDA IMEPONGEZWA KWA KUVUKA LENGO LA UKUSANYAJI MAPATO 2022/2023

Posted on: August 11th, 2023

Mkuu wa wilaya ya Singida Mhandisi Paskasi Muragili ameipongeza Manispaa Singida kwa kuvuka lengo la ukusanyaji mapato na kufikia asilimia 102 katika kipindi cha mwaka wa fedha 2022/2023

 Mhandisi Muragili, ametoa pongezi hizo leo tarehe 11,Agosti,2023 kwenye mkutano wa Baraza la Madiwani siku ya pili , uliofanyika katika ukumbi wa Maktaba Shule ya Sekondari Mwenge, ukiwa ni wa robo ya nne, mwaka wa fedha 2022/2023.

Muragili amesema Manispaa ya Singida imepiga hatua kubwa kwenye ukusanyaji wa mapato kutoka ukusanyaji wa Shs. 2,000,000 kwa mwezi huko nyuma na kufikia shilingi milioni 56 kwa mwezi Julai 2023.

Amesema makusanyo hayo ni ya chanzo kimoja cha ada ya taka, na hivyo kutoa agizo kwa Halmashauri kuhakikisha inapitia vyanzo vingine vyote kuhakikisha vinawekewa mkakati kama ilivyokuwa katika ada za taka ili navyo weze kuinuka.

Mhandisi Muragili pia , amempongeza Mstahiki Meya wa Manispaa ya Singida, madiwani, timu ya menejimenti, walimu na watendaji wa Kata na Mitaa kwa ushindi uliopatikana wa nafasi ya kwanza Kimkoa katika utekelezaji wa miradi ya Boost na kusema mafanikio hayo yametokana na usimamizi bora na shirikishi uliopelekea miradi hiyo kukamilika kwa wakati, na kwa viwango vya ubora vilivyokusudiwa na serikali.

 “Mheshimiwa mstahiki Meya wa Manispaa ya Singida, napenda nikipongeze wewe pamoja na baraza lako, wakuu wa idara, walimu, watendaji wa kata na mitaa kutokana na ushindi ulioupata kwa usimamizi bora wa mradi wa boost…….tukifanya hivyo hata Mheshimiwa Rais anayetupatia fedha, atakuwa na moyo wa kuendelea kutupatia kiasi kingine zaidi,”amesema.

Kwa upande wake Mstahiki Meya wa Manispaa ya Singida, Yagi Maulid Kiaratu, amewashukuru wananchi, wadau na watalaam kwa namna ambavyo wakekuwa wakishirikiana katika kusimamia utekelezaji wa miradi ya maendeleo na kuleta ufanisi mkubwa hasa katika miradi ya Boost.

Mhe. Kiaratu, amewashukuru pia viongozi wa Chama na serikali ambao wamekuwa bega kwa bega katika kufuatilia, kusimamia na kushauri ili kuhakikisha miradi inatekelezwa kwa kuzingatia viwango vya ubora na kukamilika kwa wakati.

Mstahiki Meya kwa namna ya kipekee ametoa pongezi kwa Kijana Raphael Malongo ambaye ametwaa nafasi ya kwanza ya Mfugaji Bora katika kanda ya ya kati kwenye maonesho ya Nane Nane ambayo yalifanyika jijini Dodoma na kusema kijana huyo ni mfano wa kuigwa na vijana wengine ili kuweza kujiajiri na kujipatia kipato.

Katika Maonesho hayo ya Kilimo na Ufugaji , Manispaa ya Singida imeshika nafasi ya Pili Kimkoa huku Halmashauri ya Iramba ikiwa ya kwanza.