MANISPAA YA SINGIDA IMEPONGEZWA KWA KUVUKA LENGO LA UKUSANYAJI MAPATO KIPINDI CHA ROBO YA PILI 2023

Posted on: March 7th, 2023

Wajumbe wa Baraza la Madwani la Halmashauri ya Manispaa ya Singida, wamepongeza juhudi zinazofanywa na Ofisi ya Mkurugenzi wa Manispaa, katika suala zima la ukusanyaji wa mapato ya ndani kwa kipindi cha Januari- March 2023.

Wajumbe wa Baraza hilo wametoa pongezi hizo leo tarehe 07/03/2023 katika mkutano wa robo ya pili wa Baraza hilo, wakati wakijadili taarifa mbalimbali za kamati.

Mstahiki Meya wa Manispaa ya Singida Yagi Maulid Kiaratu , amesema Halmashauri yake, kwa mwezi Januari, 2023 imefanikiwa kukusanya mapato kwa aslimia 104 na kutoa rai kwa wataalam kuendelea kusimamia kwa bidii ukusanyaji wa mapato kwani kipindi cha Januari na Februari ni “ low season”, kwa wafanyabiashara.

Meya Kiaratu,amemtaka Mkurugenzi wa Manispaa kufanyia kazi mapendekezo/ ushauri uliotolewa ikiwa ni pamoja na kusimamia vyema ukusanyaji wa mapato.

Aidha Mstahiki ametanabaisha kuwa kupitia asilimia 10 za mapato ya ndani, zaidi ya Shilingi milioni 400,000,000/- zimetolewa kwa vikundi vya wanawake, vijana na watu wenye ulemavu. Amesisitiza idara ya maendeleo ya jamii kuendelea kutoa elimu kwa jamii juu ya fursa za uwezeshwaji kiuchumi zilizopo ili wananchi waweze kutumia nafasi hizo.

Akijibu swali la papo  kwa papo lililohusu mkakati wa Manispaa katika kukusanya mapato ya vitunguu kwa kuwa msimu wa 2023 umekaribia, Kaimu Mkurugenzi wa Manispaa ya Singida, Jeshi Lupembe , amesema Manispaa imejipanga vyema kwani tayari imefanya mazungumzo na uongozi wa soko na wameweka mikakati madhubuti ili kuhakikisha mapato hayachepushwi.

Akichangia mjadala Mhe. Geofrey Mdama, Diwani wa Kata ya Unyianga ametoa pongezi kwa manispaa kutokana na ukusanyaji mzuri wa mapato na kusema kuwa ni matokeo ya usimamizi thabiti wa kamati ya fedha na Utawala pamoja na timu nzima ya menegimenti ya Manispaa.

Naye Mbunge wa Viti Maalum Mkoa wa Singida Martha Gwau, amepongeza ushirikiano baina ya madiwani na timu ya menejimenti na kusema ushirikiano huo ndio nguzo ya kuinua Manispaa ya Singida kufikia malengo yake.

Aidha Gwau amepongeza pia jitihada za Manispaa za utoaji mikopo ya asilimia 10 ya  fedha za mapato ya ndani na kuongeza kuwa hiyo ni kutokana na uongozi wa Manispaa kuthamini na kutambua umuhimu wa kuwezesha wananchi kiuchumi.

Kwa upande wake Naibu Meya Hassan Mkata, amehimiza ushirikiano katika usimamizi wa mapato na kuongeza kuwa, manufaa ya mapato ya ndani yameonekana ambapo ametaja baadhi ikiwa ni pamoja na ununuzi wa gari mbili za kubeba taka, ujenzi wa kituo cha Afya Mtipa pia matengenezo ya mtambo wa kuzolea taka ambao ulikuwa umesimama kwa muda mrefu.

Mbunge wa jimbo la Singida Mjini Musa Sima, pia ameipongeza Manispaa kwa jitihada za ukusanyaji mapato na kutoa rai kwa Mkurugenzi kufanya ufuatiliaji wa miradi ya kimkakati kupitia Benki ya Dunia (TACTIC) OR-TAMISEMI, ili Manispaa iweze kufaidika  kwani ni moja kati ya halmashauri 45 zitakazonufaika na mradi huo.