MANISPAA YA SINGIDA KATIKA WIKI YA MAADHIMISHO KUELEKEA KILELE CHA MIAKA 59 YA MUUNGANO

Posted on: April 20th, 2023

Katika kuelekea kilele cha maadhimisho ya miaka 59 ya Muungano wa Tanganyika na Zanzibar, wananchi wa Manispaa ya Singida wamefanya zoezi la usafi katika Soko la Kimataifa la Vitunguu, ambalo uwepo wake umetajwa kama moja ya faida  ya Muungano.

Akiongea na wananchi baada ya ya kukamilisha zoezi la usafi lililoanza leo tarehe 20 April, 2023 saa 12:30 asubuhi, Mkuu wa wilaya ya Singida Mhandisi Paskasi Muragili, amewataka wananchi hao kuuenzi Muungano kwa kuulinda na kuutetea kwa kudumisha amani iliyopo ambayo ni matokekeo ya muungano huo.

Muragili amesema wananchi wa Singida wana kila sababu ya kuulinda Muungano huo kutokana na amani na utulivu uliopo jambo ambalo nchi nyingine hazina amani hiyo .

Akizungumzia uzinduzi wa wiki ya maadhimisho ya miaka 59 ya Muungano,  Mkuu wa wilaya ya Singida amesema ,uzinduzi huo umefanyika kwa kufanya usafi ikiwa ni ujumbe mahususi kwa wananchi wote ya kwamba Manispaa ya Singida imejipanga kuwa safi na pia kuwa miongoni mwa miji bora kwa usafi nchini.

“ tumekwisha amamua na tumejipanga kuwa usafi sasa utafanyika katika maeneo yote ya makazi yetu na maeneo ya biashara….usafi wa mara moja kwa mwezi tunaachana nao badala yake utafanyika ni kila siku”, amesema Muragili.

Amewataka wananchi kulipa ada ya taka ili kuiwezesha Halmashauri ya Manispaa kuzoa taka na kupeleka dampo nje ya mji na kuongeza kuwa gharama za uzoaji taka ni kubwa kotakana na uzalishaji mkubwa wa taka uliopo, hivyo serikali peke yake haitamudu pasipo kushirikiana na jamii.

Aidha amesema kila mwananchi ahakikishe anafuata ratiba na kutoa taka nje ya nyumba ili ziweze kubebwa na kupelekwa dampo badala ya kutupa kwenye vizimba hali inayoongeza gharama ya uzoaji.

“….kila kaya inazalisha taka hivyo ni wajibu wa kila kaya kulipa ada ya taka ambayo ni shilingi 2,000 kwa mwezi na atakayekaidi hatua za kisheria zitachukuliwa dhidi yake kwani suala hili sio hiari”, amesisitiza Mkuu wa Wilaya.

Manispaa ya Singida imepanga kutekeleza shughuli mbalimbali katika kuelekea kilele cha maadhimisho ya miaka 59 ya Muungano wa Tanganyika na Zanzibar . Shughuli hizo ni pamoja na kutembelea miradi ya maendeleo na kuweka mawe ya msingi, upandaji miti, kuendesha mtahalo juu ya Historia na mafanikio ya muungano pamoja uchangiaji damu salama ambayo ni moja ya huduma za kijamii.