TUJENGE UTAMADUNI WA KUWAENZI WANANCHI WALIOTOA ARDHI KWA AJILI YA SHUGHULI ZA MAENDELEO

Posted on: July 31st, 2023

Katika kuwathamini wananchi wake, Manispaa ya Singida, imekusudia kuandaa hafla ya kuwatuza wote walijitolea ardhi kwa ajili ya kutekeleza shughuli mbalimbali za maendeleo.

Hayo yameelezwa na Mstahiki Meya wa Manispaa ya Singida, Yagi Maulid Kiaratu, kwenye hafla ya kukabidhi shule  mpya ya msingi Imbele, ujenzi uliotekelezwa kupitia mradi wa BOOST.

Mstahiki Meya alitoa ahadi hiyo, baada ya Mbunge wa Singida mjini, Mussa Sima, kumtambulisha mama Kisanga Imbele na familia yake ambao wametoa eneo, lilitumika kujenga shule hiyo mpya.

“Kwa kuthamini wananchi waliojitolea ardhi yao kwa ajili ya miradi ya maendeleo, ikiwemo shule, zahanati na vituo vya afya, Manispaa itaandaa hafla ya kuwatuza na kuwaenzi wananchi hao, pamoja na kuwapatia vyeti vya heshima, ambavyo vitakuwa kumbukumbu nzuri kwa Manispaa ya Singida” amesema Meya.

Mhe. Kiaratu ameendelea kufafanua kuwa kwa kuwaenzi na kuwatuza wananchi hawa, kutakuwa ni mfano mzuri kwa wengine hasa wale wanaojitolea maeneo yao kwa kazi za maendeleo na baadaye kuanza kudai fidia.

Kwa upande wake Mbunge wa Jimbo hilo, Mussa Sima, ameunga mkono tamko la Mstahiki Meya la kuwaenzi wananchi wazalendo waliotoa maeneo yao kwa ajili ya shughuli za maendeleo .

Katika kumpongeza mama Imbele,Mbunge Sima aliwaongoza viongozi na wananchi walioshiriki hafla hiyo ya makabidhiano, kumtuza fedha taslimu hali iliyopokelewa kwa furaha, kutokana na mwitikio mkubwa wa viongozi na wananchi waliohudhuria hafla ya kupokea mradi huo wakiwemo wanafamilia ya Imbele.

“Wananchi kama hawa, wana kila sababu ya kuenziwa, kutokana na uzalendo na upendo walioonesha kwa nchi yao, jambo linalopaswa kuigwa,” amesema Mbunge.