MANISPAA YA SINGIDA YAADHIMISHA SIKU YA MAZINGIRA DUNIANI KWA KUSHIRIKIANA NA TAASISI YA GIRL GUIDE TANZANIA

Posted on: June 4th, 2022

Halmashauri ya Manispaa ya Singida kwa kushirikianana taasisi isyo ya kiserikali ya Girl Guide Tanzania na wananchi wa Kata ya Kindai, wameadhimisha siku ya Mazingira Duniani leo tarehe 4 June, 2022 kwa kufanya usafi katika eneo linalozunguka uwanja wa mpira wa Namfua ikiwa ni njia mojawapo ya kuhamasisha Jamii kujenga tabia ya usafi katika maeneo wanayoishi ama kufanyia shughuli zao mbalimbali.

Akiongea kwa niaba ya Mkurugenzi wa Manispaa Bi. Theresia John ambaye pia ni Afisa Mazingira amesema ujumbe wa Mwaka huu  ni “TANZANIA NI MOJA TU, TUTUNZE MAZINGIRA” hivyo ni jukumu la kila mmoja kuhakikisha anatunza mazingira yanayomzunguka iwe ni nyumbani ama katika biashara.

Amesema wapo watu ambao hawafanyi usafi mpaka kusimamiwa na kuonya kuwa wahakikishe wanatii sheria bila shuruti kwani suala la uchafuzi wa Mazingira halina msamaha.

“Uchafu unaozalishwa na mtu mmoja huathiri watu zaidi ya mia moja kwani huweza kusababisha mlipuko wa magonjwa”, amesema Bi. Theresia

Naye Mwenyekiti wa Girl Guide Mkoa wa Singida Bi. Anitha Msangi alisema taasisi hiyo inayojishugulisha na elimu ya maadili mema kwa mtoto wa kike na wanawake kwa ujumla,  imeona vyema kushirikiana na jamii kufanya usafi ikiwa ni njia moja wapo ya kuelimisha jamii kuhusiana na masuala ya usafi kwa kupenda mazingira yaliyo safi kwa usalama kwa afya zao.

“Girl Guide tumeona vyema kushiriki maadhimisho haya kwa pamoja ili tuweke singida yetu safi” alisema Bi. Msangi na kuongeza kuwa wanachama walioshiriki wa girl Guide ni kutoka Halmashauri ya Wilaya ya Singida, Ikungi, na Manispaa ya Singida.

 Mwenyekiti wa Mtaa wa Dodoma Road Ndg. Maulid Ramadhani  amesema zoezi hilo la usafi katika eneo la Namfua linapswa kufanyika kwa nguvu zote na kwa kuweka tozo za juu ili kila mwenye shughuli eneo hilo awajibike kwa usafi na kwamba eneo hilo ni uso wa mji wa singida.

“Magari mengi hupumzika hapo kabla ya kuendelea na safari hasa malori, hivyo bila kuweka faini kubwa uchafunzi wa mazingira utakuwa mkubwa sana” alisema.

Manispaa ya Singida hufanya shughuli ya usafi kila mwisho wa wiki (Jumamosi) ambapo wananchi katika makazi yao na maeneo ya biashara huwajibika kufanya usafi wa kina ambapo maeneo yote ya biashara hufungwa mpaka muda wa saa tatu asubuhi ndipo hufunguliwa baada ya usafi kukamilika.

Zoezi hili la usafi ni mwendelezo wa kampeni ya usafi wa Mazingira iliyozinduliwa na Mkuu wa Mkoa wa Singida Dr. Binirith Mahenge 30 Oktoba, 2021 ya kuuweka Mkoa wa Singida katika hali ya usafi na mandhari ya kupendeza.