MANISPAA YA SINGIDA YAANZA HATUA ZA AWALI ZA MRADI WA UJENZI WA JENGO JIPYA LA UTAWALA

Posted on: February 16th, 2023

Halmashauri ya Manispaa ya Singida imeanza utekelezaji wa mradi wa ujenzi wa jengo jipya la utawala katka eneo la Karakana, kata Misuna litakalogharimu zaidi ya Tsh. Bilioni 3.

Akelezea hali ya utekelezaji mradi huo Kaimu Mkurugenzi wa Manispaa ya Singida, Jeshi Lupembe, amesema Mradi huo wa Ujenzi ghorafa tatu pamoja na mambo mengine unatarajia kutoa ajira haswa kwa vijana kupitia mradi wa ufyatuaji tofali kwa ajili ya ujenzi katika hatua za awali.

Jeshi amesema tayari Manispaa imeshatoa matangazo ya nafasi za kazi ndogo ndogo ambazo wananchi wanakaribishwa kuziomba katika kipindi cha utekelezaji wa mradi.

Shughuli zilizofanyika hadi sasa kwa mujibu wa Kaimu Mkurugenzi huyo ni usafishaji wa eneo na uwekaji uzio huku shughuli ya uchimbaji visima kwa ajili ya maji yatakayotumika kipindi cha ujenzi ikifuata.

Aidha amefafanua zaidi kuwa Mahitaji mengine kama Mchanga, Mawe, kokoto na saruji yanatarajiwa kununuliwa na kupelekwa eneo la ujenzi wakati wowote.

“ …tumeshaanza shughuli za kusafisha eneo la ujenzi…..udongo umeshapelekwa kwa ajili ya vipimo na mchoro wa jengo unafanyiwa mapitio( review)…….mahitaji kama mchanga kokoto, mawe, saruji yatanunuliwa hivi karibuni na kusogezwa eneo la mradi mara moja kwa kuwa  stoo ipo….”, amefafanua Jeshi.

Mkurugenzi huyo amesema tayari fedha kiasi cha Tsh.Bilioni 1, kimepokelewa na Halmashauri ya Manispaa kwa ajili ya utekelezaji wa mradi wa ujenzi wa jengo hilo.