MANISPAA YA SINGIDA YAANZA KWA KISHINDO MICHUANO YA UMISSETA NGAZI YA MKOA

Posted on: June 11th, 2024

WAKATI michuano ya UMISSETA ngazi ya Mkoa Singida ikiendelea kwa ajili ya maandalizi ya kuunda timu za mkoa, timu za Manispaa ya Singida zimeanza kwa kishindo katika michuano hiyo.

Manispaa ya Singida ilianza kwa kishindo katika soka kwa wavulana kwa kuichapa Manyoni mabao 3-0 kisha ikatoa sare ya 1-1 dhidi ya Iramba, huku dada zao wakiichapa Manyoni 3-0 na wakitoka suluhu dhidi ya Iramba.

Katika mchezo wa Kikapu, Manispaa walikuwa moto baada ya kuibuka na ushindi wa vikapu 30-2dhidi ya Manyoni kisha wakaibuka na vikapu 24-2 dhidi ya Iramba hawa ni wavulana, lakini upande wa wasichana katika mchezo huohuo, Manispaa walishinda vikapu 11-9 dhidi ya Manyoni kisha wakaichapa Iramba kwa vikapu 10-4.

Mchezo wa wavu kwa wasichana Manispaa walishinda seti 2-0 Mkalama, huku wavulana wa Manispaa wakishinda set 2-0 dhidi ya Manyoni na Manispaa wakipoteza mchezo huhuo dhidi ya Iramba kwa set 2 -0.

Michezo hiyo ngazi ya mkoa inatarajia kuendelea leo Jumanne katika viwanja vya Sekondari ya Mwenge vilivyopo Manispaa ya Singida.

Ikumbukwe kuwa michuano ya UMISSETA taifa inatarajiwa kufanyika Juni hii, mkoani Tabora.