MANISPAA YA SINGIDA YAANZA MAANDALIZI YA MICHEZO YA SHIMISEMITA

Posted on: September 5th, 2023

Watumishi wa Halmashauri ya Manispaa ya Singida wametakiwa kutumia muda vizuri kwa kushiriki katika michezo ili kujenga afya pamoja na kuongeza wasifu wa mtumishi.

Mkurugenzi wa Manispaa ya Singida Jeshi Lupembe, ambaye pia ni mwenyekiti wa Shirikisho la Michezo Serikali za Mitaa (SHIMISEMITA) ameyasema hayo tarehe 04 Septemba,2023 wakati akizungumza na watumishi waliokuwa katika mazoezi ya maandalizi ya michezo mbalimbali kwa ajili ya kushiriki michezo ya SHIMISEMITA, yanayofanyika katika viwanja vya shule ya sekondari ya Mwenge, Manispaa ya Singida

Jeshi amesema Michezo pamoja na kujenga Afya, lakini pia inaimarisha mahusiano, ushirikiano, uzalendo na urafiki hivyo kuwaasa watumishi kupenda kutumia muda wao wa ziada katika michezo.

Mkurugenzi Jeshi amesema pamoja na michezo mbalimbali ya mipira, pia michezo mingine kama draft, darts, bao, kuvuta Kamba, kukimbiza kuku na fani za ndani kama ngoma itakuwepo hivyo kutaka wanamichezo kujiandaa vyema katika fani zote

Manispaa ya Singida imeanza maandalizi ya michezo ya Shirikisho la Michezo Serikali za Mitaa            ( SHIMISEMITA) kwa mchezo wa urafiki wa  mpira wa pete baina yake na Halmashauri ya wilaya ya Ikungi ambapo timu ya Manispaa illibuka mshindi.

Aidha timu ya mpira wa miguu (football) baina ya Watendaji na walimu wote wa Manispaa ya Singida umechezwa katikaviwanja vya mwenge sekondari, mchezo ambao timu ya walimu iliibuka kidedea.

Kwa Mujibu wa Afisa Michezo, Utamaduni na Sanaa, Samwel Mwaikenda, mashindano hayo yanaendelea katika michezo mbalimbali ili kuweza kupata timu bora ya Manispaa.

“Michezo hii sio tuu kwa ajili ya SHIMISEMITA, bali pia kwa ajili ya uendelevu wa michezo ambayo kwa kipindi kirefu ilikuwa imedorora”, amesema Mwaikenda.