MANISPAA YA SINGIDA YAANZA UJENZI WA OFISI ZA WAFANYABIASHARA WADOGO - MACHINGA

Posted on: May 2nd, 2023

Halmashauri ya Manispaa ya Singida leo  tarehe 2 Mei, 2023 imezindua ujenzi wa jengo la ofisi za wafanyabiashara wadogo (Machinga) kufuatia fedha zilizotolewa na serikali kuu shilingi milioni 10 kwa ajili ya ujenzi huo ili kuwezesha wafanyabiashara hao kufikika wakati wote.

Akizindua ujenzi wa ofisi hizo, Mstahiki Meya wa Manispaa ya Singida , Yagi Kiaratu, amesema kukamilika kwa ujenzi huo kutasaidia wafanyabiashara hao kufikika kirahisi kupitia uongozi wao, ambao sasa watakuwa na sehemu ya kuendeshea shughuli zao za kiutawala na kutatua kero za wadau wao.

“ uwepo wa ofisi hii utanufaisha pande zote , kwetu kama serikali tukitaka kujadiliana nanyi masuala ya mbalimbali ya maendeleo tunajua mahali pa kuwapata, lakini pia kwenu katika kuwahudumia wanachama wenu wanajua mahali pa kuwapata”, amesema Meya wa Manispaa

Uzinduzi huo ambao ulishirikisha Uongozi wa Manispaa, wakuu wa idara na vitengo, Uongozi wa Kata na Mtaa, viongozi wa wafanyabiasahara wadogo maarufu kama machinga na Uongozi wa waendesha bodaboda na bajaji, umefanyika kwa  shughuli ya uchimbaji Msingi, ambao utasaidia kupunguza gharama ya ujenzi kutokana na msingi huo kuchimbwa na jamii badala ya fundi.

Akisoma taarifa ya mchakato wa ujenzi wa ofisi hizo, Kaimu Mkurugenzi wa Manispaa ya Singida Jeshi Lupembe amesema, Manispaa ya Singida imepokea fedha kiasi cha Tshs. Milioni 10 kutoka ofisi ya Mkuu wa Mkoa Singida, kwa ajili ya ujenzi wa ofisi za Machinga fedha ambazo zimetolewa na serikali kuu.

Jeshi amesema Halmashauri ya Manispaa imeanza ujenzi wa ofisi hizo mtaa wa Uwanja wa Ndege Kata ya Mandewa katika eneo lililotengwa kwa shughuli za soko,  maarufu kama Soko la Mahinya, ili kutoa nafasi kwa machinga kutumia eneo hilo kwa shughuli za biashara sambamba na ofisi ili kurahisisha utoaji huduma kwa walengwa bila usumbufu.

Amesema Manispaa imepanga kurasimisha eneo hilo kwa shughuli za gulio la kila wiki ili wafanyabiashara wadogo waweze kuendesha biashara zao kwa uhuru na nafasi. Na kuongeza kuwa uwepo wa gulio la kila Ijumaa litaongeza thamani ya eneo hilo lakini pia kutanua mji.

Kaimu Mkurugenzi huyo amefafanua kuwa ujenzi wa ofisi hizo unatarajia kugharimu kiasi cha Tshs. Milioni 46 hadi kukamilika kwake na hivyo kutoa rai kwa sekta binafsi kushirikiana na serikali kukamilisha mradi huo wenye manufaa kwa wananchi wote.

Kwa upande wake Mkuu wa Idara ya Viwanda,Biashara na uwekezaji, Eric Sinkwembe, amesema uwepo wa ofisi ya wafanyabiashara wadogo na watoa huduma wadogo wa usafiri  (bajaji na bodaboda) ni faraja kubwa na kwamba changamoto zilizokuwa zikiwakabili wadau ya kukosa eneo la kukutania  sasa zimetatuliwa.

Amesema awali, wadau hao walikuwa wakilazimika kukutana sehemu isiyorafiki  ili kujadiliana masuala yao lakini kwa sasa changamoto hiyo imepata ufumbuzi kwani watakutana eneo rasmi kwa kusikilizwa na kutatua changamoto zinazowakabili.

“ kwa sasa hivi ili mdau aweze kusaidiwa ni lazima amtafute kiongozi kwa simu au amfuate eneo lake la biashara hivyo kusababisha usumbufu”, amesema Sinkwembe

Wakiongea kwa niaba ya wamachinga Mwenyekiti wa Machinga Ismail Otta na Makamu mwenyekiti  Bi. Asha Shaban, wamemshukuru Rais wa Jamhuri ya Muungano wa Tanzania Samia Suluhu Hassan kwa kutimiza ahadi yake ya kutoa eneo na fedha kwa ajili ya ujenzi wa ofisi za Machinga katika kila mkoa, ahadi aliyoitoa katika kikao chake na viongozi wa machinga jijini Dodoma.

Aidha viongozi hao wameishukuru serikali pia kwa kuwatambau wamachinga kama kundi maalum na kwamba sasa wanaweza kukaa meza moja kujadili chngamoto mbalimbali bila mvutano wowote.

Pamoja na Shukrani hizo wameupongeza Uongozi wa Manispaa Mstahiki Meya wa Manispaa ya Singida Yagi Kiaratu pamoja na Kaimu Mkurugenzi wa Manispaa Jeshi Lupembe, kwa ushirikiano wanaoutoa kwa lengo la kuboresha mazingira ya kufanya biashara kwa manufaa ya Mchinga  lakini pia manufaa ya Manispaa ya Singida

Kata ya Mandewa ni moja ya kata zenye maeneo mengi yaliyotengwa kwa ajili ya uwekezaji yakiwemo maeneo kwa ajili ya masoko,na  taasisi za umma .