MANISPAA YA SINGIDA YAIMARISHA UHUSIANO NA TAASISI ZINGINE KUPITIA BONANZA LA WATUMISHI

Posted on: February 25th, 2023

25 Februari, 2023, Manispaa ya Singida, imefanya bonanza lililohusisha watumishi wa Halmashauri na taasisi mbalimbali, zikiwemo za umma na za binafsi, kwa lengo la kuimarisha afya, umoja na mahusiano baina yao.

Akifungua Bonanza hilo, Mstahiki Meya wa Manispaa Yagi Maulid Kiaratu amepongeza ofisi ya Kaimu Mkurugenzi wa Halmashauri ya Singida kwa maandalizi mazuri, aliyodai kuwa licha ya kujenga afya, pia litaimarisha ushirikiano kati ya watumishi wa Manispaa na taasisi nyingne.

Katika Bonanza hilo, licha ya Mstahiki Meya kuzungumza na watumishi na wananchi, alifafanua juu ya utekelezaji wa shughuli za maendeleo zilizotekelezwa kwa kipindi cha miaka mitatu, tangu Rais wa awamu ya sita Dkt. Samia Suluhu Hassan, aingine madarakani.

Amezitaja baadhi ya kazi hizo kuwa ni ujenzi wa vyumba vya madarasa 92, zikiwemo fedha za Uviko-19 na serikali kuu, zahanati tano, vituo vipya vya afya viwili na ujenzi wa majengo ya upasuaji wa mama na mtoto kwa vituo viwili vya afya.

Aidha Mstahiki Meya, ameyataja mafanikio mengine kuwa ni ujenzi wa kituo kipya cha afya katika kata ya Mtipa kupitia fedha za mapato ya ndani, ujenzi wa machinjio mapya kwenye eneo la Ng’aida, ukamilishaji  vyumba viwili vya madarasa na ujenzi wa vyoo vya shule ya Sekondaari Maharu.

Kutokana na mafanikio hayo, Mstahiki Meya amewataka watumishi wa taasisi zote kukuza ushirikiano na kuimarisha umoja, ili kuwezesha miradi ya maendeleo kutekelezwa kwa wakati.

Kwa upande wake Mwenyekiti wa CCM Wilaya ya Singida Mjini, Lucia Mwiru, ameipongeza Manispaa ya Singida kwa hatua kubwa ya maendeleo katika kipindi cha miaka sita, tangu aingie madarakani.

Mwenyekiti huyo amesema kuwa, katika kipindi hicho hajawahi kuona mapato ya ndani ya Manispaa ya Singida yakifanya kazi kubwa, kama ilivyo sasa na kuongeza kuwa mafanikio hayo yametokana na ushirikiano na mahusiano imara baina ya ofisi ya Mkurugenzi, watumishi, madiwani na taasisi mbalimbali.

Katika Bonanza hilo, zilizetolewa zawadi mbalimbali, ikiwemo fedha taslimu kutoka, zilizotolewa na Mstahiki Meya, aliyezituza timu shiriki, kwa kila goli moja lililofungwa shilingi elfu kumi, hivyo kufanya jumla ya shilingi zaidi ya laki moja kuzawadiwa kwa timu shiriki.

Michezo mbalimbali iliyofanyika katika Bonanza hilo ni, shindano la kula mkate na kunywa soda, jogging, mazoezi ya viungo, riadha, mbio za magunia, kuvuta kamba, kufukuza kuku, mpira wa miguu na mpira wa pete.    

Mstahiki Meya wa Manispaa akifuata nyayo za Rais wa Jamhuri ya Muungano wa Tanzania, Dkt. Samia Suluhu Hassan ya kuwatunza wanamichezo, kwa meya huyo kutoa zaidi ya Tshs. 100,000/-  kwa kila goli lililofungwa na timu shiriki