MANISPAA YA SINGIDA YAKABIDHIWA MRADI WA MIL.214,019,750

Posted on: November 22nd, 2023

Halmashuri ya Manispaa Singida  hivi karibuni imekabidhiwa rasmi mradi wa Empowered  School Program ambao umegharimu kiasi cha ashilingi milioni 214,019 750, kutoka katika Shirika la Worldserve International ambalo limefanikiwa kujenga uwanja wa kisasa wa mpira wa kikapu (Basketball), na miradi  mingine mitatu ndani ya Shule ya Msingi Mwaja na tayari imezinduliwa.

Uzinduzi wa uwanja huo ulienda sambamba na miradi mingine ikiwemo ufunguzi wa bustani ya shule, kisima cha maji huku Shule ya Msingi Mwaja ikikabidhiwa vishikwambi 48 kwa ajili ya wanafunzi wa madarasa  ya awali. 

Uzinduzi  huo ambao uliongozwa na Naibu Meya wa Manispaa ya Singida, Geofrey Mdama akiwa na Kaimu Mkurugenzi wa Manispaa, Edward Mboya, Mwakilishi wa Shirika la Worldserve International, Rebecca Mmbaga. 

Wengine waliohudhuria uzinduzi huo ni Mkuu wa Idara ya Elimu Msingi, Mkuu wa Idara ya Uchumi na Mipango, Mkuu wa Kitengo cha Micheza, Sanaa na Utamaduni, kamati ya Shule, Viongozi wa Chama, Mtendaji wa Mtaa, Walimu wa Shule ya Mwaja, Kamati ya Serikali Mtaa na Ushirikiano kati ya Walimu na Wazazi. 

Naibu Meya wakati akizindua miradi hiyo, aliwashukuru Worldserve International Kwa kazi kubwa ambayo wamefanya huku akisisitiza kuwa ni vyema  shule zikatunza na kuendeleza miradi hiyo kwani imegharimu fedha nyingi katika utekelezaji wake na mfadhili  alikuwa na uwezo wa kupeleka fedha sehemu  nyingi lakini aliona Manispaa ya Singida katika Shule ya Mwaja  walikuwa na uhitaji na wakaweza kufanikisha hilo.

Naye mwakilishi wa Mkurugenzi wa Worldserve International, Rebecca Mmbaga alisema walipata fursa na kuweka mradi huo lengo lilikuwa ni kusaidia shule na jamii ambayo inazunguka eneo hilo na  uwanja ambao wamejenga ni kwa ajili ya michezo na shule zingine  zitaruhusiwa kutumia na hata jamii kwa kufuata utaratibu. 

Aliongeza kwa upande wa matumizi ya maji jamii itaruhusiwa Kwa utaratibu maalum wa kuvutiwa nje ya eneo la shule.

Mmbaga alisema: "Naukabidhi rasmi mradi huo kwa Shule ya Msingi Mwaja ukiwa umegharimu kiasi cha milioni 214,019,750  na mtawajibika kutunza na kufanyia marekebisho na Worldserve International watapita kukagua, kutembelea na kuona shule inapata faida gani kupitia miradi hiyo na shirika litatoa ushauri wake kiufundi.

"Na sasa rasmi  nakabidhi mradi huu kwa Mkurugenzi wa Manispaa Singida sababu wao ndiyo wasimamizi wakuu wa shule hii ya Mwaja ambao ni wanufaika wa mradi huu."

Naye Kaimu Mkurugenzi wa Manispaa, Edward Mboya alisema: "Nimekabidhiwa mradi ukiwa katika hali nzuri sasa ni jukumu letu kuilinda na kuitunza jambo ambalo litawapa faraja wafadhili wetu kuona inaendelea kizazi na kizazi lakini shule hili ni jukumu lenu  kuhakikisha mnatunza miradi hii."