MANISPAA YA SINGIDA YAPANDA MITI, HUDUMA ZA KIJAMII KATIKA KUELEKEA KILELE CHA MAADHIMISHO YA MIAKA 62 YA UHURU WA TANGANYIKA

Posted on: December 8th, 2023

Katika safari ya kuelekea kilele cha maadhimisho ya miaka 62 ya Uhuru wa Tanganyika, Ofisi ya Mkuu wa Wilaya Singida kwa kushirikiana na Halmshauri ya Manispaa Singida wamefanya shughuli mbalimbali za kijamii ambazo ni pamoja na kupanda miti, kutembelea wagonjwa na kutoa misaada, na kufanya usafi wa mazingira kuzunguka Kituo cha Afya cha Sokoine, kilichopo katika Kata ya Misuna Manispaa ya Singida.

 Shughuli hizo zimefanyika leo Desemba 8, 2023, zikiongozwa na Katibu Tawala Wilaya ya Singida, Bi. Naima Chondo ambaye aliambatana na viongozi mbalimbali wa chama na Serikali.

Viongozi hao ni pamoja na Mstahiki Meya wa Manispaa ya Singida, Yagi Kiaratu, Mkurugenzi wa Manispaa, Jeshi Lupembe, Viongozi wa Chama cha Mapinduzi wilaya ya Singida Mjini, madiwani, watumishi wa Manispaa makao makuu na ngazi ya kata pamoja na wananchi wa Kata ya Misuna waliojitokeza kushiriki katika shughuli hizo.

Katibu Tawala, Bi Naima Chondo, amesema maadhimisho ya miaka 62 ya Uhuru mwaka huu, yamelenga katika utunzaji wa mazingira hivyo wilaya ya Singida, kwenye Manispaa ya Singida lengo hilo limetekelezwa Kwa vitendo kwa  kupanda miti.

Bi. Chondo amesisitiza pia umuhimu wa kuitunza miti hiyo kwa ajili ya kizazi kijacho lakini pia kukabiliana na mabadiliko ya tabianchi.

Aidha amehimiza suala zima la   kufanya kazi kwa bidii na kwa kushirikiana hasa katika kusimamia miradi ya Maendeleo na kutoa huduma nzuri Kwa wananchi kwani Kwa kufanya hivyo itampa sifa kubwa Rais wa Jamhuri ya Muungano wa Tanzania Dkt. Samia Suluhu Hassan ambaye dhamira yake kuu ni kuhakikisha wananchi wanapata huduma bora na Kwa wakati.