MANISPAA YA SINGIDA YATAKIWA KUMALIZA MIGOGORO YA MIPAKA BAINA YA MITAA, KATA NA WILAYA JIRANI

Posted on: September 9th, 2022

MKUU wa Wilaya ya Singida, Mhandisi Paskasi Muragili, ametaka migogoro ya ardhi baina ya mitaa kwa mitaa na kata kwa kata katika Manispaa ya Singida ambayo ni ya muda mrefu kutatuliwa mara moja.

Mhandisi Mulagiri ametoa agizo hilo katika mkutano wa Baraza la madiwani ambapo alimwagiza Kaimu Mkurugenzi wa Manispaa Jeshi Lupembepamoja na timu yake kuhakikisha wanakutana na pande  zote zenye migororo na kutatua tatizo husika kwa kuwa lipo ndani ya uwezo wa Manispaa.

“hamuhitaji mtu wa nje kuja kutatua mgogoro wa mpaka baina ya mtaa na mtaa au kata kwa kata kwa kuwa ipo ndani ya uwezo wa Mkurugenzi wa Manispaa” alisema

Mkuu wa wilaya ametoa miezi miwili ya kumaliza migogoro hiyo ya ardhi na kumwelekeza Mkurugenzi na timu yake kukutana na wakurugenzi  wa wilaya za jirani zenye mgogoro wa mipaka baina yao na Manispaa ili kumaiza tatizo lililopo.

Pamoja nayo Mkuu wa Wilaya amepiga marufuku ufugaji holela wa mifugo hasa ng’ombe kwenye eneo la mji kutokana na uharibifu wa miundombinu ya barabara unaofanywa na mifugo hiyo na kusema kuwa serikali, imetumia  gharama kubwa katika ujenzi wa barabara hizo kwa ajili ya kuwaletea wananchi maendeleo hivyo ni wajibu wa kila mwananchi kuzitunza.

Akizungumzia suala la mapato, Mhandisi Mulagiri aliwaagiza  waheshimiwa madiwani na wataalamu kusimamia vyema vyanzo vya mapato na kuwataka madiwani kuwa na taarifa  sahihi za mapato katika kata zao na kuvitambua vyanzo vya mapato katika maeneo yao ili waweze kuvitetea na kuvisemea katika vikao.

Aidha Mkuu huyo wa wilaya, ametoa rai kwa Manispaa kuhakikisha inajenga haraka machinjio mapya katika eneo lililotengwa nje ya mji, ili kuwaondolea wananchi adha ya kupishana ovyo na ng’ombe wanaokwenda kuchinjwa katika machinjio ya zamani yaliyopo katikati ya mji wa Singida.

Katibu wa CCM Singida mjini Shaban Kalaghe amesema ni jukumu la kila mmoja kusimamia vyema maagizo ya viongozi kwa kuwayafanyia kazi na Chama kupatiwa mrejesho.

Amesema  ni jukumu la kila mmoja kuisemea miradi na jitihada mbalimbali za kuleta maendeleo zinazofanywa na serikali ili wananchi wawe na ufahamu katika suala zima la maendeleo.

Akihitimisha Mkutano wa Baraza Mstahiki Meya wa Manispaa ya Singida Yagi Maulid Kiaratu aliwashukuru wajumbe kwa kumpitisha kwa sauti mmoja mgombea pekee wa nafasi ya Naibu Meya  Mh. Hassan Mkata na kumtaka kuendeleza kazi aliyokwishaianza ya kuiletea Manispaa ya Singida Maendeleo.

Mhe.Yagi alitoa agizo kwa Mkurugenzi wa Manispaa  kuhakikisha anasimamia sheria, taratibu na kanuni za kiutendaji  na sheria za fedha ili kuepuka hoja za ukaguzi zisizo za msingi, kusikiliza kero za wananchi pamoja  na suala zima la usafi na mazingira pia upandaji miti.

Mstahiki Meya pia amesisitiza suala la elimu ya lishe bora ili kuondokana na utapiamlo katika Manispaa ya Singida na kumtaka Mkurugenzi kuandaa program ya mazoezi ya miili kwa watumishi na waheshimiwa madiwani.

Baraza la Madiwani jana lilimpitisha mgombea pekee wa nafasi ya Naibu Meya wa Manispaa Mh. Hassan Mkata kuwa Naibu Meya kwa kipindi cha pili. Aidha lilipitisha wenyeviti wapya wa Kamati za Kudumu za madiwani pamoja na wajumbe wa kamati hizo.